Футзал бўйича Ўзбекистон чемпионати ўз якунига етди. Жиззах вилояти жамоаси «Сўғдиёна» дебьют мавсумда 4-ўринни олишга муваффақ бўлди. Чемпионат ва дебьют мавсумдаги таассуротлар ҳақида жиззахлик ёш ва истеъдодли дарвозабон Фаёз Жўрабоев билан суҳбатлашдик.
Катта футбол эмас футзални танладим
– Ёшлигимдан футзалга бўлган қизиқишим баланд эди. Шу сабабли 2013 йилда Жиззах Олимпия захиралари коллежига ҳужжат топширдим. У ерда менга футзал сир-асрорларини ўрганишимда Наим Усмонов, Мусулмон Мамадалиев ва Жаҳонгир Камоловлар катта ёрдам беришди. Орада катта футболда ҳам ўзимни синаб кўрдим. «Сўғдиёна» ўринбосарлар жамоасида машғулотлар ўтказдим. Аммо футзалдаги шиддат мени ўзига чорлади ва яна футзалга қайтиб Самарқаднинг «Нафис» жамоасида фарлиятимни давом эттирдим. У ерда менга Дилшод Ҳайдарқулов ва Азиз Сатторовлар устозлик қилишди.
Рустам Умаров футзалга кириб келишимга сабабчи бўлган
– Ҳар бир инсонда ўзи ёқтирган идеали бўлади. Менинг идеалларимдан бири Рустам Умаровдир. Бу инсон Ўзбекистон ва жаҳонда мен учун кучли дарвозабонлардан бири. Олдинлари «Спорт» ТВ да футзал бўйича чемпинати жонли эфирда намойиш этиларди ва мен Рустам Умаровнинг ҳар бир ҳаракатидан намуналар олишга ҳаракат қилар эдим. Кейинчалик ўзимни U-20 саралашида синаб кўрдим. Йиғинда иштирок этдим. Айнан у ерда дарвозабонлар бўйича мураббий сифатида Рустам Умаров ишлар эди. Ўз кумиримни кўриш нақадар бахт эди ва мен имкон қадар Рустам акадан кўпроқ сир-асрорларни ўрганишга ҳаракат қилар эдим. Афсуски жароҳатим туфайли U – 20 Осиё чемпионатида иштирок эта олмадим. Шу ўринда айтиб ўтишим керак Рустам Умаровга ўхшаб миллий терма жамоада тўп тепиш менинг орзуимдир.
«Сўғдиёна» да эканлигимдан бахтлиман
– Самарқанднинг «Нафис» жамоаси фаолияти якунланганидан сўнг «Сўғдиёна» га чақирув бўлди. Албатта, мен учун ўз вилоятим жамоасини ҳимоя қилиш фахрли. Бунинг учун Ойбек Абдураҳмонов ва Сирожиддин Эргашевларга ўз миннатдорчилигимни билдираман. «Сўғдиёна»га жароҳат билан келдим ва деярли ярим мавсум ўйнай олмадим. Лекин жамоадаги муҳит ва интилиш мени тезроқ сафга қайтишга ундади. Биринчи даврани асосан ёш ва маҳаллий футзалчилар билан бошладик. Озроқ тажрибасизлигимиз сабабли муҳим очколарни қўлдан бой бердик. Иккинчи даврада эса сафимизга тажрибали футзалчилар келиб қўшилди. Бизда озроқ ҳадик бор эди. Энг кутилмаган ҳодиса бу Дилшод Раҳматовни Хитойдан келгани бўлди. Улардан биз кўплаб сабоқлар ва тажриба олдик. Улар машғулотлар ва ўйин давомида бизни фақат олға ундади ва ўзимизга бўлган ишончни орттирди.
«Сўғдиёна» да эканлигимдан бахтлиман
– Қисқа муддат давомида бир оила бўла олдик. Менимча шу таркиб билан кейинги мавсумда кучли учлик учун бемалол кураша оламиз. «Сўғдиёна» катта оилага айлана олди. Нафақат биз, балки асосий таркиб, аёллар жамоаси, ўринбосарлар бўладими ҳамма бир мақсад йўлида бирлашдик. Ҳар бир жамоа ўйин ўтказаётганида бир- биримизни қўллаб-қувватлаб турамиз.
Бизга куч берган бу-мухлисларимиз
– Футзал мусобақаларининг ҳозирги формати бизга анча маъқул келди. Вилоятларда футзалга бўлган эътибор кучайди. Мухлислар эса футзал учрашувларига кела бошлади. Ҳар бир уй учрашувида залимизга 400-500 га яқин мухлис ташриф буюради. Улар қаршисида ўйнаш катта маъсулият. Ҳар бир ўйинда бизга куч берган бизни олға юришга ундаган бизнинг мухлисларимиздир. Улар ғалабаларда биз билан бирга қувонишди, мағлубиятда эса ёлғиз қолдиришмади. Сафарларда ҳам биз билан бирга бўлдилар. Уларга доимо ўз миннатдорчилигимизни изҳор қиламиз.
Умуман айтганда «Сўғдиёна» даги фаолиятимдан мамнунман. Дебьют мавсумда 4-ўринга эга бўлиш бу катта натижа. Бу борада «Сўғдиёна» рахбариятига барча шароитларни яратиб , бизни доимо қўллаб-қувватлаб тургани учун ўз миннатдорчилигимизни изҳор қиламиз. Кейинги мавсумда ҳам рахбариятимизни мухлисларимизни юзини ёруғ қилишга ҳаракат қиламиз –дейди «Сўғдиёна» футзал жамоаси дарвозабони Фаёз Жўрабоев
«Сўғдиёна» ПФК матбуот хизмати
