Испания чемпионатининг 14-турида "Атлетико" клуби очко йўқотди. Симеоне шогирдлари Каталонияда "Жирона" жамоаси меҳмони бўлиб, сўнгги дақиқаларда мағлубиятдан қутулиб қолишди.

Биринчи бўлимда мадридликлар нурсиз ўйин намойиш қилишди. Боз устига, тайм сўнгида ўз дарвозалари томон пенальти "ишлашди". Кристиан Стуани 11 метрлик жарима зарбасидан унумли фойдаланиб, мавсумдаги 11-голини уришга муваффақ бўлди.

Ўйиннинг сўнгги қисми мезбонлар учун бироз омадсиз кечди. Дастлаб дарвозабон Яссин Буну жароҳат олиб, майдонни тарк этишга мажбур бўлди. Баҳс тугашига 8 дақиқа қолганида эса Диего Коста томонидан берилган зарбани Рамальо ўз дарвозасига тўғрилаб қўйди — 1:1.

Ушбу дуранг туфайли "Атлетико" вақтинчалик бўлса-да жадвалда 1-ўринга кўтарилиб олиш имкониятидан фойдалана олмади. "Жирона" эса 21 очко билан 5-поғонага чиқиб олди.

Испания Ла лигаси, 14-тур
Жирона – Атлетико 1:1 (1:0, 0:1)
Голлар: 1:0 – 45, пенальти Стуани, 1:1 – 82, автогол Рамальо.
Жирона – Буну (Ирайсос, 72), Рамальо, Эспиноса, Хуанпе, Порро, Понс, Гранель, Робертс (Порту, 66), Алеиш Гарсия (Фернандес, 83), Гарсия, Стуани.
Атлетико – Облак, Люка Эрнандес, Савич, Арьяс (Желсон Мартинш, 74), Коке, Сауль, Родри Эрнандес (Корреа, 64), Парти, Лемар, Гризманн, Диего Коста.
Огоҳлантиришлар: Гризманн (17), Коке (41), Парти (72), Диего Коста (89), Сауль (89).