Ispaniya chempionatining 14-turida "Atletiko" klubi ochko yo‘qotdi. Simeone shogirdlari Kataloniyada "Jirona" jamoasi mehmoni bo‘lib, so‘nggi daqiqalarda mag‘lubiyatdan qutulib qolishdi.

Birinchi bo‘limda madridliklar nursiz o‘yin namoyish qilishdi. Boz ustiga, taym so‘ngida o‘z darvozalari tomon penalti "ishlashdi". Kristian Stuani 11 metrlik jarima zarbasidan unumli foydalanib, mavsumdagi 11-golini urishga muvaffaq bo‘ldi.

O‘yinning so‘nggi qismi mezbonlar uchun biroz omadsiz kechdi. Dastlab darvozabon Yassin Bunu jarohat olib, maydonni tark etishga majbur bo‘ldi. Bahs tugashiga 8 daqiqa qolganida esa Diyego Kosta tomonidan berilgan zarbani Ramalyo o‘z darvozasiga to‘g‘rilab qo‘ydi — 1:1.

Ushbu durang tufayli "Atletiko" vaqtinchalik bo‘lsa-da jadvalda 1-o‘ringa ko‘tarilib olish imkoniyatidan foydalana olmadi. "Jirona" esa 21 ochko bilan 5-pog‘onaga chiqib oldi.

Ispaniya La ligasi, 14-tur
Jirona – Atletiko 1:1 (1:0, 0:1)
Gollar: 1:0 – 45, penalti Stuani, 1:1 – 82, avtogol Ramalyo.
Jirona – Bunu (Iraysos, 72), Ramalyo, Espinosa, Xuanpe, Porro, Pons, Granel, Roberts (Portu, 66), Aleish Garsiya (Fernandes, 83), Garsiya, Stuani.
Atletiko – Oblak, Lyuka Ernandes, Savich, Aryas (Jelson Martinsh, 74), Koke, Saul, Rodri Ernandes (Korrea, 64), Parti, Lemar, Grizmann, Diyego Kosta.
Ogohlantirishlar: Grizmann (17), Koke (41), Parti (72), Diyego Kosta (89), Saul (89).