Хабарингиз бор, Ўзбекистон Профессионал футбол лигаси мавсум бошидан буён ҳар ой энг яхшиларни аниқлаб келди.

Ташкил этилган сўровномада PEPSI  Суперлиганинг 12 та клуби бош мураббийлари ва сардорлари иштирок этиб келишди. Шунингдек, мухлислар овози ПФЛ расмий сайтида бўладиган сўровнома орқали қабул қилинди. 

Мана Суперлиганинг 2018 йилги мавсуми ҳам якунига етди. Ортда қолган ноябрь ойида Суперлигада 28-29-30-31-32-тур учрашувлари ўтказилди. Мазкур учрашувларда бир қатор мутахассислар қўл остидаги жамоалар чиройли ўйин намойиш этиб, кўпчиликнинг эътирофига сазовор бўлишди. Жумладан, Тошкентнинг “Локомотив” жамоаси чемпионатнинг охирини ҳам юқори даражада ўтказишида “темирйўлчилар” жамоаси устози Андрей Фёдоровнинг хизмати улкан бўлганини қайд этиш жоиз. “Локомотив” ортда қолган ойда 5та ўйин ўтказиб, 4та ғалаба ва 1та дуранг қайд этди. Жамоа мавсум сўнггида Суперлига чемпионлигини тантана қилди. Мавсумни у қадар муваффақиятли бошлай олмаган “Локомоитив”ни Фёдоров йил охирига келиб чемпионликка етаклай олди. 

Шу тариқа, ноябрь ойининг энг яхши мураббийи дея Андрей Фёдоров топилди. У сўровномада Нўъмон Хасанов ҳамда Рўзиқул Бердиевни ортда қолдириб кетди.