Осиё кубоги бошланишига ҳам оз вақт қолмоқда. Термамизнинг ишлари эса кўнгилдагидек дейишга тил бормайди. Билмадим, балки оптимистик руҳ етишмаётгандур менга. Айниқса, Ливан билан ўйинни томоша қилгандан сўнг қандайдир ишончсизлик пайдо бўлди. Биласизми, Жанубий Кореа билан ўйин ҳақида эса тўхталгим ҳам келмаяпти… Энг алам қиладиган нарса шуки: Жамоамиз ўйинида ҳеч қандай янги руҳият кўринмаяпти. Келинг, тан олайлик, «нимадир» қўшилмаган. Фақат ҳимоя билан бирон нарсага эришиш қийинроқ, чамамда. Бизнинг футболчилар Осиёда ўзларининг техникаси билан ажралиб туришган. Бизда «атлет» футболчилар деярли йўқ ҳисоб… Лекин ўртоқлик ўйинлари кўрсатиб турибди-ки, эҳтиёткор ва ҳимоявий ўйин намоиш этилмоқда. Бунга бирдан кўникиш қийиндек гўё, лекин на илож? Келинг иккита мураббийимизнинг қўл остидаги ўйинларни эслаймиз.

Рауф Инилеев

Ўзбекистон термаси бу мураббий қўл остида Тошкетда ўша пайтлари Саудия Арабистонини 3:0 ҳисобида енгиб анча шов-шув кўтарган эди. Умуман, Рауф Талгатович қўл остида натижалар кам бўлса ҳам, лекин жудаям чиройли ўйин намоиш этган эдик. Ўша пайтлари Саудия ҳозиргидан анчга кучли бўлганини ҳисобга олсак, ўша пайтдаги даражамиз кучли бўлганидан далолат.

Вадим Абрамов

Албатта, ҳозиргача бу мураббийни тарафдорлари юртимизда талайгина. Футболимизда бурулиш ясаган, уйқудаги «Оқ бўриларни» уйғота олган мураббий эди у. Унинг қўлостидаги битта ўйинни эслаб ўтамиз. Эсингизда бўлса, Тошкентта Япония билан ўйинда 1:1 қайд этган эдик. Бу ўйиннинг натижаси эмас, шиддатини ёдингизга солмоқчимиз. Ўша учрашувда жамоамиз шу қадар «доминировать» қилгандики, натижада ўйин тугагач, бутун стадион «самурайлар» билан дурангдан норози бўлиб кетган эди. Мен ўзим ўша ўйинни стадиондан кузатган эдим. Японлар ўйин сўнгида ҳимоядан чиқа олмай, тўпни тепиб юборишар, натижага ўйнашга уринишарди. Уларни Осиёда бунчалар қийналганини бошқа кўрмадим. Кейинчалик Япониядаги ўйинда Абрамов жамоаси Тошкентга ғалаба билан қайтганини кўпчилик яҳши эсласа керак.

Купер тоға
Ҳозирча Купер тоғанинг услуби кўринмаяпти. Қатар билан бўлган ўйинда эса юлдузларимиз ўйинни ўзларига олиб ғалабани тақдим этишди. Бошқа ёрқин ўйин ҳали намоиш этилганича йўқ. Майли, сабр билан кутамиз. Бизда бошқа вариант ҳам йўқ. Хайрулло Ҳамидов айтганидек: «Унинг кучига Осиё кубогидан сўнг баҳо берамиз».

Купер тоға, сиздан умидимиз катта! Ўзбек халқи футболсевар халқ, бу халқ мағлубиятлардан чарчади. Сиздан илтимос, мухлисларни яна футболга қайтаринг! Бунинг учун эса ёрқин ғалаба ва чиройли ўйин кўрсатишингиз керак! Эсингиздан чиқмасин, миллионлаб қора кўз сиздан умидвор!

Яҳёхўжа Улуғхўжаев