Ўзбекистон Миллий олимпия қўмитаси президенти Умид Аҳмаджонов нуфузли мусобақаларда совриндор бўлган бухоролик спортчиларни тақдирлаш маросимида иштирок этди. Бу ҳақда Миллий олимпия қўмитаси Матбуот ва медиа департаменти директори Зафар Имомхўжаев хабар бермоқда.
Маълумки, 2018 йил ўзбек спорти учун муваффақиятларга бой бўлди. Ортда қолган йил давомида атлетлар бир нечта комплекс мусобақаларда иштирок этдилар.
Жакарта шаҳри мезбонлик қилган Осиё ҳамда Параосиё ўйинлари, Буэнос-Айресда бўлиб ўтган ўсмирлар Олимпиадасини шулар қаторига киргизиш мумкин. Мазкур мусобақаларда ўзбекистонлик спортчилар медаллар сони ва сифати бўйича натижаларни яхшилай олдилар.
Миллий олимпия қўмитаси президенти Умид Аҳмаджонов айни вақтда Бухоро вилоятида бўлиб турибди. Аҳмаджонов сафар доирасида Параосиё ва ўсмирлар Олимпия ўйинларида совриндор бўлган бухоролик спортчиларни тақдирлаш маросимида иштирок этди. Бухоро шаҳридаги «Ёшлар маркази»да ташкил этилган тадбирда вилоят ҳокими Ўктам Барноев ҳам қатнашди.
Тадбир давомида III ўсмирлар Олимпия ўйинларида олтин медалга эга чиққан спортчилар – Абдумалик Халаков (бокс) ва Умиджон Жалолов (эркин кураш) “Spark” автомобиллари билан тақдирланди.
Шунингдек, уларнинг мураббийлари, Параосиё ўйинлари совриндорлари Феруз Саидов, Ширин Шарипов, Шариф Ҳалилов, Шерзод Намозов, Шуҳрат Бобоев ва Муҳаммад Риҳсимов каби спортчиларга қимматбаҳо совғалар топширилди. Умид Аҳмаджонов сафар давомида вилоятдаги бошқа спорт объектларига ташриф буюриши ҳам режалаштирилган.
