Кеча, 11 январь куни Ўзбекистон терма жамоа Дубай шаҳрида Туркманистонга қарши ўйин олдидан иккинчи машғулотини ўтказди. Терма жамоанинг машғулоти шаҳардаги “Dubai Police Officers Club” стадионида бўлиб ўтди.
Машғулотларда БААга терма жамоа сафида келган барча футболчилар иштирок этди. ОАВ вакиллари учун машғулотнинг дастлабки 15 дақиқаси очиқ бўлди.
Бош мураббий Эктор Купернинг ёрдамчилари ушбу жараённи бошлаб беришди. Купернинг ўзи эса жараённи жиддий назар билан четдан кузатиб турди.
Футболчиларнинг кайфияти аъло даражада бўлиб, биринчи ўйиндаги ғалаба хурсандчилиги уларни тарк этмаганига гувоҳ бўлдик.
Машғулотларнинг ёпиқ қисмини ҳам стадиондан кузатиб шунга амин бўлдикки, терма жамоа футболчилари бугун жиддий синовлардан ўтиш билан бирга машғулотларда сидқидилдан ишлашди.
Эътиборингизга терма жамоанинг навбатдаги машғулотларидан фоторепортажни ҳавола қиламиз. Қуйидаги фоторепортаж ўз ичига 40 та суратни жамлаган бўлиб, сифатли ҳамда ёқимли кадрларни бизга ахборот ҳамкоримиз “WorldNews” нашри тақдим этди.
Айтганча, машғулотлар якунлангандан сўнг, Дубайда жойлашган “Crowne Plaza” меҳмонхонасида ўзбекона тадбир ташкил этилди. Бу ҳақда кейинги постни ўқинг.
Дубай шаҳридан махсус
