Бугун, 16 январь куни Япония терма жамоаси Ўзбекистонга қарши ўйин олдидан Ал-Айн шаҳридаги “Халифа Бин Зайид” стадионида расмий машғулотларини ўтказди.
“F” гуруҳида биринчи ўринни аниқлаб берадиган ўйин олдидан ўтказилган машғулотлар ОАВ вакиллари учун очиқ бўлди.
Жумладан, рақибларимизнинг машғулотларини Stadion.uz мухбири Акмал Эшонхонов бевосита стадиондан туриб кузатди.
Акмал Эшонхоновнинг айтишига кўра, японияликлар асосий эътиборни жарима зарбаларини амалга ошириш, узоқ ва қисқа пасларни тўғри ташкиллаштиришга қаратишган. Шунингдек, рақиб футболчилари чиниқиш, тез югуриш ҳамда кўнгилочар машқларни ҳам адо этишди.
Жамоа бош мураббийи Хадзимэ Мориясу эртага катта эҳтимол билан асосий таркиб футболчиларига дам бериши кутилмоқда.
Аммо мураббий бугунги матбуот анжуманида, футболчиларидан фақат ғалаба учун майдонга тушишлари ва оддий ғалаба қозонишни талаб қилишини таъкидлади.
Қуйида Япония терма жамоасининг машғулотларидан олинган фотосуратлар ҳамда видеони эътиборингизга ҳавола қиламиз. Видео 15 январь куни суратга олинган.
