Ла-Манш бўғозида «Кардифф» ҳужумчиси Эмилиано Саланинг ҳалокатга учраган Piper PA-47 Malibu самолёти қолдиқлари ўрганилмоқда.
Сувости видеокамерасидан фойдаланилган ҳолда самолётнинг ичида бир жасад борлиги аниқланган. Ҳозирча унинг шахси аниқланмаган. Эслатиб ўтамиз, ҳаво кемаси бортида футболчи ва учувчи Дэвид Айбботсон бўлган эди.
Маълумот ўрнида, 21 январь куни кечқурун Эмилиано Сала Франциянинг «Нант» клубидаги жамоадошлари билан хайрлашиб, «Кардифф Сити» билан шартнома имзолаш мақсадида, хусусий самолётда Уэльсга учиб кетди. Бироқ, самолёт кўзланган манзилга етиб келишидан 1 соат олдин радарлардан йўқолиб қолди. Бундан бироз аввалроқ, футболчи WhatsApp’даги чатга «ҳозир самолёт парчаланиб кетса керак», деган хабарни жўнатишга улгурган эди. Самолёт қолдиқлари 3 февраль куни денгиз остидан топилди. Уни излаш ишларига хайрия асосида катта миқдорда маблағ тўпланди.
