“Бунёдкор” клуби раҳбарияти томонидан 6-8 февраль давомида клуб академиясида фаолият олиб бораётган мураббийлар касбий маҳорати синовдан ўтказилди.
Имтиҳон давомида мураббийларнинг майдонни машғулотга тайёрлаш, машғулот давомида болаларга кўрсатмалар бериб бориш усуллари, мураббийнинг машғулот давомида ўзини тутиши, футболчиларнинг машғулотдаги хатоларини аниқлаш, кўрсатиб бориш ва ўша хатоларни тўғирлаш борасида амалга оширадиган хатти-ҳаракатлари текширилди. Шунингдек, мураббийларнинг машғулот пайтида болаларни назорат қилиб бориш учун позиция танлашдаги билим ва кўникмалари ҳамда машғулот давомидаги фаоллиги кўздан кечирилди. Мураббийлар касбий маҳоратларини синовдан ўтказишда “Бунёдкор” бош директори У.Мирзаев, академия директори В.Шадиматов, илмий маслаҳатчи Р.Акромов, психолог Т.Усова ва бир қатор малакали мутахассислар жалб қилинди.
Жами 21 нафар мураббийлардан имтиҳонлар олинди ва шулардан айрим мураббийларга маҳоратини ошириш ва ўз устида ишлаш учун имконият бериш баробарида, малакали мураббийлар томонидан уларга услубий кўрсатмалар бериб борилиши таъкидланди. Белгиланган режа асосида, олти ойлик муддатдан сўнг улардан қайтадан имтиҳон олиш ҳақида огоҳлантирилди.
