Ўзбекистон профессионал футбол лигаси олдинда турган янги мавсумдан олдин суперлига клублари олдига бир қатор жиддий талабларни қўйган эди.
Бу талабларнинг энг асосийларидан бири , ҳар бир клуб ўзининг футбол академиясига эга бўлиши ёки ЎФА қошидаги бирон академия билан шартнома қилиши лозим эди.
“Қўқон-1912” футбол клуби бугун ПФЛнинг академия масаласидаги талабини бажарди. Қўқонликлар раҳбарияти кеча ЎФА қошидаги Фарғона футбол академияси билан ҳамкорлик шартномасини имзоладилар.
Энди стадион борасидаги талабга келадиган бўлсак, Қўқондаги “Марказий” стадионда катта ҳажмдаги ишлар бошлангани ҳақида аввал хабар берган эдик. Бугунги кунда “Марказий” стадион майдони тўлиқ янгиланиш арафасида.
Стадионга сифати юқори бўлган тайёр чим олиб келиб ўрнатилади. Айни кунда майдон дренаж ва суғориш тизимлари тўлиқ янгиланиб, чимни ётқизиш учун тайёр ҳолатга келтирилган.
Мутахассислар чим ётқизиш учун бироз қулай бўлган об-ҳаволи кунларни кутиб турибдилар. Яқин кунларда “Марказий” стадионига янги чимни ўрнатиш бошланади.
Шунингдек “Қўқон-1912” ёритгичларни ҳам янгиланиб, ПФЛ талаб қилган люкс ҳолатига келтирилади.
