Туркиянинг KOC компанияси Ўзбекистон Суперкубоги-2019 бош ҳомийси бўлади. Бу ҳақда ЎзПФЛ матбуот хизмати хабар бермоқда.
Маълум қилинишича, Ўзбекистонда янги футбол мавсуми старт олишига саноқли кунлар қолган. Футбол мавсумини Ўзбекистон Суперкубоги учун ўтказиладиган ўйин очиб беради.
Мамлакат чемпиони “Локомотив” ҳамда Ўзбекистон кубогининг амалдаги соҳиби АГМК жамоалари ўртасида кечадиган Суперкубок ўйинига Туркиянинг KOC Elektrik AS компанияси бош ҳомий бўлади.
“Ушбу компания Ўзбекистон бозорига футбол орқали кириш нияти бор эканини билдирди. Мамлакат Суперлигаси ҳомийлиги учун асосий номзод бор эканидан келиб чиқиб, ПФЛ KOC Elektrik AS учун Суперкубок ўйинини таклиф қилди.
Компания вакиллари 2019 йилги мавсум давомида миллий чемпионат учрашувлари ташкилотчилиги, шунингдек, Суперлига бренди оммалашувини ўрганиб боради. Агар барчаси кўнгилдагидек кетса, ушбу компания билан ҳамкорлик 2020 йилдан бошлаб янада каттароқ масштабда давом этиши мумкин”, дейилади ПФЛ хабарида.
Маълумот ўрнида, Ўзбекистон Суперкубоги-2019 ўйини 23 февраль куни Тошкентдаги “Пахтакор” стадионида соат 16:00 да бошланади. “Спорт” телеканали учрашувни тўғридан-тўғри эфирда намойиш этади. Аввалроқ учрашув 15:00 га тайин қилинганди.
Янги келишувдан кейин Профессионал футбол лигаси мухлислар кўнглини олиш учун концерт дастурини ҳам режалаштирди ҳамда “Спорт” билан келишиб, учрашувни 16:00 га кўчирди.