Turkiyaning KOC kompaniyasi O‘zbekiston Superkubogi-2019 bosh homiysi bo‘ladi. Bu haqda O‘zPFL matbuot xizmati xabar bermoqda.

Ma’lum qilinishicha, O‘zbekistonda yangi futbol mavsumi start olishiga sanoqli kunlar qolgan. Futbol mavsumini O‘zbekiston Superkubogi uchun o‘tkaziladigan o‘yin ochib beradi.

Mamlakat chempioni “Lokomotiv” hamda O‘zbekiston kubogining amaldagi sohibi AGMK jamoalari o‘rtasida kechadigan Superkubok o‘yiniga Turkiyaning KOC Elektrik AS kompaniyasi bosh homiy bo‘ladi.

“Ushbu kompaniya O‘zbekiston bozoriga futbol orqali kirish niyati bor ekanini bildirdi. Mamlakat Superligasi homiyligi uchun asosiy nomzod bor ekanidan kelib chiqib, PFL KOC Elektrik AS uchun Superkubok o‘yinini taklif qildi. 

Kompaniya vakillari 2019 yilgi mavsum davomida milliy chempionat uchrashuvlari tashkilotchiligi, shuningdek, Superliga brendi ommalashuvini o‘rganib boradi. Agar barchasi ko‘ngildagidek ketsa, ushbu kompaniya bilan hamkorlik 2020 yildan boshlab yanada kattaroq masshtabda davom etishi mumkin”, deyiladi PFL xabarida.

Ma’lumot o‘rnida, O‘zbekiston Superkubogi-2019 o‘yini 23 fevral kuni Toshkentdagi “Paxtakor” stadionida soat 16:00 da boshlanadi. “Sport” telekanali uchrashuvni to‘g‘ridan-to‘g‘ri efirda namoyish etadi. Avvalroq uchrashuv 15:00 ga tayin qilingandi.

Yangi kelishuvdan keyin Professional futbol ligasi muxlislar ko‘nglini olish uchun konsert dasturini ham rejalashtirdi hamda “Sport” bilan kelishib, uchrashuvni 16:00 ga ko‘chirdi.