Профессионал боксчимиз Шаҳрам Ғиёсов бугун Мексиканинг Тихуана шаҳрида ўзининг еттинчи жангида рингга кўтарилди.

Ушбу жангда ҳамюртимиз мезбон спортчи Эдгар Пуэртога қарши рингга кўтарилди. Қувонарлиси, Шаҳрам бу жангида ҳам муддатидан олдин ғалаба қозонди. Бешинчи раундда унинг кетма-кет зарбаларидан сўнг рақиб мувозанатни йўқотди. Шу сабаб, ҳакамлар баҳсни тўхтатишди ва Ғиёсов жангни муддатидан олдин ўз фойдасига ҳал қилди.

Мазкур баҳс орқали ўзбекистонлик боксчи фаолиятидаги еттинчи жангида еттинчи ғалабани расмийлаштирди. У жангларининг 6 тасида рақибларини нокаутга учратган. Мексикалик Эдгар Пуэртонинг ўтказган жанглари сони эса 38 тага етди. Уларнинг 25 тасида ғалаба қозонган (19 та нокаут). 12 маротаба мағлубиятга учраган (6 та нокаут) ва 1 та дурангга эришган.

Ушбу ғалаба билан Шаҳрамни муборакбод этамиз.