Наманганнинг “Навбаҳор” U-21 ёшлар жамоаси Андижон вилоятида 24 февралдан старт олган “Ҳоким кубоги - 2019” мусобақасида қатнашмоқда.

Мазкур турнирнинг “А” гуруҳидан жой олган “лочинлар” гуруҳ доирасидаги сўнгги баҳсни бугун Андижоннинг “УзДонгЯнг” жамоасига қарши ўтказиб, 2:1 ҳисобида ғалаба қозонди. Раҳим Ғофуров шогирдларидан голларга Абдурасул Қаюмбаев ва Шерзод Ғуломжонов (пенальтидан) муаллифлик қилди.

Ўз навбатида “Навбаҳор” ёшлари учрашувнинг ҳакам томонидан қўшиб берилган вақтида 11 метрли жарима зарбасини амалга ошириш ҳуқуқини қўлга киритди ва пенальтини захирадан майдонга туширилган Шерзод Ғуломжонов аниқ амалга ошириб, жамоасига ғалаба келтирган голни урганлигини ҳам таъкидлаш жоиз.   

“УзДонгЯнг”га қарши кечган баҳсда “Навбаҳор” таркибида қуйидаги футболчилар ҳаракат қилди: Миржалол Маматхонов, Раҳим Шарипов, Шаҳзод Ҳамидов, Содиқ Ортиқов, Миржалол Абдумуталов, Аюбхон  Жўраев, Қодир Икромов, Комил Тожиддинов, Улуғбек Акназаров, Абдурасул Қаюмбаев, Бобиршоҳ Собиров.

Захирадан майдонга тушганлар: Шерзод Ғуломжонов, Ҳусайн Эргашев, Абдулазиз Жалилов.    

Ушбу ютуқдан сўнг “Навбаҳор” ёшлари чорак финал йўлланмасини қўлга киритди. Мазкур босқичда Раҳим Ғофуров шогирдларига қайси жамоанинг рақиб бўлиши эртага маълум бўлади.