Namanganning “Navbahor” U-21 yoshlar jamoasi Andijon viloyatida 24 fevraldan start olgan “Hokim kubogi - 2019” musobaqasida qatnashmoqda.
Mazkur turnirning “A” guruhidan joy olgan “lochinlar” guruh doirasidagi so‘nggi bahsni bugun Andijonning “UzDongYang” jamoasiga qarshi o‘tkazib, 2:1 hisobida g‘alaba qozondi. Rahim G‘ofurov shogirdlaridan gollarga Abdurasul Qayumbayev va Sherzod G‘ulomjonov (penaltidan) mualliflik qildi.
O‘z navbatida “Navbahor” yoshlari uchrashuvning hakam tomonidan qo‘shib berilgan vaqtida 11 metrli jarima zarbasini amalga oshirish huquqini qo‘lga kiritdi va penaltini zaxiradan maydonga tushirilgan Sherzod G‘ulomjonov aniq amalga oshirib, jamoasiga g‘alaba keltirgan golni urganligini ham ta’kidlash joiz.
“UzDongYang”ga qarshi kechgan bahsda “Navbahor” tarkibida quyidagi futbolchilar harakat qildi: Mirjalol Mamatxonov, Rahim Sharipov, Shahzod Hamidov, Sodiq Ortiqov, Mirjalol Abdumutalov, Ayubxon Jo‘rayev, Qodir Ikromov, Komil Tojiddinov, Ulug‘bek Aknazarov, Abdurasul Qayumbayev, Bobirshoh Sobirov.
Zaxiradan maydonga tushganlar: Sherzod G‘ulomjonov, Husayn Ergashev, Abdulaziz Jalilov.
Ushbu yutuqdan so‘ng “Navbahor” yoshlari chorak final yo‘llanmasini qo‘lga kiritdi. Mazkur bosqichda Rahim G‘ofurov shogirdlariga qaysi jamoaning raqib bo‘lishi ertaga ma’lum bo‘ladi.
