Жорий йилнинг 2-12 март кунлари Россиянинг Красноярск шаҳрида ўтказилаётган Бутунжаҳон қишки универсиадасида Ўзбекистон спортлик спортчилар ҳам иштирок этиши ҳақида хабар берган эдик.

Бугун делегациямиз аъзолари Ислом Каримов номидаги Тошкент халқаро аэропортидан мусобақада иштирок этиш учун жўнаб кетди.

Мусобақада юртимиз шарафини Али Тўхтаев ва Иван Меркушин мураббийлигида Комилжон Тўхтаев, Дамир Бухарбаев, Алдиёр Гаипов, Екатерина Лябина ҳамда Жасур Маҳмудов ҳимоя қилишади.

Бу галги Универсиадада 50 дан ортиқ давлатдан 3000 нафарга яқин спортчи иштирок этиши кутиляпти. Талаба-спортчилар биатлон, тоғ чанғиси, керлинг, чанғи пойгалари, сноуборд, конкида фигурали учиш, фристайл, хоккей, тўпли хоккей, чанғида мўлжални олиш ва шорт-трек каби 11 та спорт тури бўйича 76 та медаллар жамланмаси учун кураш олиб боришади.
Спортчиларимиздан юқори натижалар кутиб қоламиз.