Жароҳат футболчиларнинг энг катта душмани десак муболаға бўлмайди. Зеро, жароҳат сабабли ўйинчилар ё маълум муддатга севимли касбидан четга чиқади ёки умуман фаолиятини тугатади. Шу боис, жароҳат олган ўйинчига кўрсатиладиган биринчи ёрдам ўта муҳим аҳамият касб этади. Биринчи ёрдамни нафақат шифокорлар, балки бошқа ходимлар ҳам бера олиши эса ҳар қандай жамоанинг ютуғи саналади.
Олдига доим юқори мақсадларни қўядиган «Бунёдкор» ана шундай жиҳатларга ҳам эътибор қаратмоқда. Хусусан, бугун жамоанинг барча ходимлари ва аъзолари учун «Футбол майдонидаги биринчи тиббий ёрдам» мавзусида семинар ўтказилади. Табиийки, семинарда футбол майдонидаги биринчи тиббий ёрдам қандай кўрсатилиши тўлиқ тушунтириб берилади. Семинарда «Бунёдкор» жамоаси академияси тиббиёт маркази раҳбари Отабек Муслимов маъруза ўқийди.
