Jarohat futbolchilarning eng katta dushmani desak mubolag‘a bo‘lmaydi. Zero, jarohat sababli o‘yinchilar yo ma’lum muddatga sevimli kasbidan chetga chiqadi yoki umuman faoliyatini tugatadi. Shu bois, jarohat olgan o‘yinchiga ko‘rsatiladigan birinchi yordam o‘ta muhim ahamiyat kasb etadi. Birinchi yordamni nafaqat shifokorlar, balki boshqa xodimlar ham bera olishi esa har qanday jamoaning yutug‘i sanaladi.
Oldiga doim yuqori maqsadlarni qo‘yadigan «Bunyodkor» ana shunday jihatlarga ham e’tibor qaratmoqda. Xususan, bugun jamoaning barcha xodimlari va a’zolari uchun «Futbol maydonidagi birinchi tibbiy yordam» mavzusida seminar o‘tkaziladi. Tabiiyki, seminarda futbol maydonidagi birinchi tibbiy yordam qanday ko‘rsatilishi to‘liq tushuntirib beriladi. Seminarda «Bunyodkor» jamoasi akademiyasi tibbiyot markazi rahbari Otabek Muslimov ma’ruza o‘qiydi.
