Ўзбекистон суперлигасининг биринчи туридан ўрин олган «Пахтакор» ва «Локомотив» жамоалари ўртасидаги учрашувнинг қолдирилишига ПФЛ қарши бўлган. Бу ҳақда GoSport.uz интернет-нашри манбалари хабар бермоқда.

«ПФЛ бу борада айби борлигини тан олади. Чунки биз охиригача принципларимизга содиқ қолиб ўйинни кўчирилишига қарши бўлгандик. Аммо иккала клуб келишиб олгач, принципларимизни четга суриб, ўйинни захира кунига кўчиришга мажбур бўлдик. Шунда ҳам ФИФА кунларига қадар 16 февраль захира кунимиз борлиги учун шундай қарорга келинди. Агар захира куни бўлмаганида ўйин қолдирилмаслиги мумкин эди.

Ўзи йил бошида халқаро тақвим борлиги инобатга олиниб, мазкур ўйин жума кунига қўйилганди. Аммо клублар шунга ҳам норозилик билдиришгач, аввалига «Пахтакор» ариза билан чиқди. Бошида қаршилик қилмаётган «Локомотив» ҳам кейин икки жамоа келишиб олганини айтиб, ўйинни кўчиришимизни сўради», деган ПФЛ ходими GoSport манбаси билан суҳбатда.

Эслатиб ўтамиз, «Пахтакор» ва «Локомотив» жамоалари 8 март куни майдонга тушишлари лозим эди. ПФЛ икки томон мурожаатини инобатга олиб, ўйинни 16 март кунига кўчирди.