O‘zbekiston superligasining birinchi turidan o‘rin olgan «Paxtakor» va «Lokomotiv» jamoalari o‘rtasidagi uchrashuvning qoldirilishiga PFL qarshi bo‘lgan. Bu haqda GoSport.uz internet-nashri manbalari xabar bermoqda.
«PFL bu borada aybi borligini tan oladi. Chunki biz oxirigacha prinsiplarimizga sodiq qolib o‘yinni ko‘chirilishiga qarshi bo‘lgandik. Ammo ikkala klub kelishib olgach, prinsiplarimizni chetga surib, o‘yinni zaxira kuniga ko‘chirishga majbur bo‘ldik. Shunda ham FIFA kunlariga qadar 16 fevral zaxira kunimiz borligi uchun shunday qarorga kelindi. Agar zaxira kuni bo‘lmaganida o‘yin qoldirilmasligi mumkin edi.
O‘zi yil boshida xalqaro taqvim borligi inobatga olinib, mazkur o‘yin juma kuniga qo‘yilgandi. Ammo klublar shunga ham norozilik bildirishgach, avvaliga «Paxtakor» ariza bilan chiqdi. Boshida qarshilik qilmayotgan «Lokomotiv» ham keyin ikki jamoa kelishib olganini aytib, o‘yinni ko‘chirishimizni so‘radi», degan PFL xodimi GoSport manbasi bilan suhbatda.
Eslatib o‘tamiz, «Paxtakor» va «Lokomotiv» jamoalari 8 mart kuni maydonga tushishlari lozim edi. PFL ikki tomon murojaatini inobatga olib, o‘yinni 16 mart kuniga ko‘chirdi.