Бугун — 9 март санасида “Сўғдиёна” ва “Бунёдкор” клубларининг U-21 жамоалари 1-тур доирасида майдонга тушиши керак эди.

Айни вақтда “Сўғдиёна” ўринбосарлари тўп сурадиган мажмуада таъмирлаш ишлари давом этмоқда. Профессионал футбол лигаси ўйингоҳларда реконструкция ишларини олиб бораётган жамоаларга имконият бераётгани барчага маълум. Шундан келиб чиқиб, “Сўғдиёна” U-21 ва “Бунёдкор” U-21 жамоалари ўртасидаги беллашув сунъий қопламали стадионда бўлиб ўтади.

Учрашув комиссари Жаҳонгир Раҳматуллаев ўйин ўтиши керак бўлган майдонда айрим камчиликларни аниқлади. Хусусан, дарвоза тўрлари, устун ва тўсинларидаги камчиликларни кўз билан бемалол илғаш мумкин эди. Шунингдек, сунъий қопламада ҳам муаммолар бор. 

Комиссар талаби билан дарвозаларга янги тўр олиб келинди, устун ва тўсинлардаги ҳунук манзаралар бартараф этилди. Бироқ қопламани бир куннинг ўзидаёқ тартибга келтиришнинг имконияти йўқ. 

“Сўғдиёна” жамоаси U-21 жамоаси тўп сурадиган майдон қачон тўлиқ таъмирдан чиқиши аниқ эмас. Шундан келиб чиқиб, Профессионал футбол лигаси “Сўғдиёна” клубининг олдига жиддий талаб қўйди. Клубнинг кейинги уй учрашувига қадар ё сунъий майдондаги муаммолар тўлиқ бартараф этилиши керак ёки U-21 жамоалар учрашувни асосий майдонда ўтказади. Шунингдек, захира майдонидаги таъмирлаш ишлари энг камида биринчи давра якунига қадар битиши керак.  

“Сўғдиёна” клуби раҳбарияти ЎзПФЛ талабини қабул қилди ва навбатдаги уй учрашувига қадар кафолат хати тақдим этди. Бу каби ҳолатлар қолган клублар учун ҳам ўрнак ўрнида хизмат қилиши керак. Жорий мавсумдан эътиборан U-21 жамоаларга беэътибор бўлган клубларни жиддий санкциялар кутади. Агар U-21 жамоалар иштирокидаги икки учрашув ўз вақтида бўлиб ўтмаса, у ҳолда асосий жамоа ҳам лигадан четлаштирилиши мумкин.