“Сурхон” ҳамда “Металлург” жамоалари шу кунгача Термиз шаҳрида кучлилар сафида ўзаро еттита ўйин ўтказган бўлса, шулардан бештасида кучлар тенг келган. Coca Cola Суперлиганинг 1-турида ҳам бу анъана давом этди. Бу гал бекободликлар сўнгги дақиқалардагина мағлубиятдан қутилиб қолишди...

Бевосита ўйин тафсилотига тўхталадиган бўлсак, майдонда тўп сураётган жамоаларнинг даражаси илк дақиқаларданоқ сезилиб турди.

Меҳмонлар сафида тажрибали, маҳоратли ўйинчилар кўплиги, жамоавий ўйиннинг шаклланганлиги кўзга ташланди. Бироқ майдон эгалари илк ўйинга ўзгача иштиёқ билан тайёрланганлигини исботлади.

Ўн беш йиллик танаффусдан сўнг кучлилар сафида илк ғалаба билан мухлисларни хурсанд этиш иштиёқи “Сурхон” футболчиларининг ҳар бир ҳаракатида, майдоннинг ҳар бир қаричи, ҳар битта тўп учун кураш олиб боришида ўз аксини топди.

Бунинг устига тезкор гол уларни янада руҳлантириб юборди. Бешинчи дақиқада Аббос Отахоновнинг жарима майдонида узоқлаштирган тўпини тажрибали Шавкат Саломов эгаллаб олди ва узун тўп ошириш эвазига Шерзод Ҳакимовни дарвозабон билан яккама якка ҳолатга олиб чиқди.

“Нефтчи”дан жанубликлар сафига келиб қўшилган Шерзод бу вазиятдан оқилона фойдаланиб, ҳисобни очди – 1:0.

Меҳмонлар бутун ўйин давомида ҳудудий устунликда ҳаракат қилган бўлса-да, фақатгина сўнгги дақиқаларда мағлубиятдан қутилиб қолишди.

Бекободликлар жонига стандарт вазият оро кирди. Ислом Исоқжоновнинг жарима майдонига узатиб берган тўпи бир неча ўйинчига тегиб, олис бурчаккача етиб борди.

Ушбу вазиятда ҳужумчиларга ёрдамга етиб келган Аббос Отахонов абжирлик кўрсатиб, тўпга биринчи бўлиб улгурди ва ҳисобни тенглаштирди – 1:1.