“Surxon” hamda “Metallurg” jamoalari shu kungacha Termiz shahrida kuchlilar safida o‘zaro yettita o‘yin o‘tkazgan bo‘lsa, shulardan beshtasida kuchlar teng kelgan. Coca Cola Superliganing 1-turida ham bu an’ana davom etdi. Bu gal bekobodliklar so‘nggi daqiqalardagina mag‘lubiyatdan qutilib qolishdi...

Bevosita o‘yin tafsilotiga to‘xtaladigan bo‘lsak, maydonda to‘p surayotgan jamoalarning darajasi ilk daqiqalardanoq sezilib turdi.

Mehmonlar safida tajribali, mahoratli o‘yinchilar ko‘pligi, jamoaviy o‘yinning shakllanganligi ko‘zga tashlandi. Biroq maydon egalari ilk o‘yinga o‘zgacha ishtiyoq bilan tayyorlanganligini isbotladi.

O‘n besh yillik tanaffusdan so‘ng kuchlilar safida ilk g‘alaba bilan muxlislarni xursand etish ishtiyoqi “Surxon” futbolchilarining har bir harakatida, maydonning har bir qarichi, har bitta to‘p uchun kurash olib borishida o‘z aksini topdi.

Buning ustiga tezkor gol ularni yanada ruhlantirib yubordi. Beshinchi daqiqada Abbos Otaxonovning jarima maydonida uzoqlashtirgan to‘pini tajribali Shavkat Salomov egallab oldi va uzun to‘p oshirish evaziga Sherzod Hakimovni darvozabon bilan yakkama yakka holatga olib chiqdi.

“Neftchi”dan janubliklar safiga kelib qo‘shilgan Sherzod bu vaziyatdan oqilona foydalanib, hisobni ochdi – 1:0.

Mehmonlar butun o‘yin davomida hududiy ustunlikda harakat qilgan bo‘lsa-da, faqatgina so‘nggi daqiqalarda mag‘lubiyatdan qutilib qolishdi.

Bekobodliklar joniga standart vaziyat oro kirdi. Islom Isoqjonovning jarima maydoniga uzatib bergan to‘pi bir necha o‘yinchiga tegib, olis burchakkacha yetib bordi.

Ushbu vaziyatda hujumchilarga yordamga yetib kelgan Abbos Otaxonov abjirlik ko‘rsatib, to‘pga birinchi bo‘lib ulgurdi va hisobni tenglashtirdi – 1:1.