Европа лигасида нимчорак финал босқичи якунланиб, чорак финалга чиққан 8 жамоанинг номи аниқ бўлди. Бугун турнирнинг чорак финал ва ярим финал босқичига қуръа ташлаш маросими бўлиб ўтади.

Қачон ва қаерда?
Европа лигаси чорак финал ва ярим финал босқичига қуръа ташлаш маросими УЕФА қароргоҳи жойлашган Швейцариянинг Ньон шаҳрида бўлиб ўтади. Тадбир Тошкент вақти билан 17:00да бошланади (16:00да эса ЕЧЛ қуръаси бўлиб ўтади).

Чорак финалга чиққан жамоалар:
"Айнтрахт" (Германия)
"Арсенал" (Англия)
"Бенфика" (Португалия)
"Валенсия" (Испания)
"Вильяреал" (Испания)
"Наполи" (Италия)
"Славия" (Чехия)
"Челси" (Англия)


Қуръа механизми
— Қуръа "кўр-кўрона" принципи асосида ўтказилади. Жамоалар саватчаларга ажратилмайди. Бир мамлакат клублари ўзаро тўқнаш келиши мумкин.

— Қуръада номи биринчи чиққан жамоа дастлабки ўйинни ўз уйида ўтказади. Лекин Англиянинг икки жамоаси клублари уй ўйинларини бир кунда ўтказишмайди. Шунинг учун, агар "Арсенал" ва "Челси"нинг уй ўйинлари битта ҳафтага тўғри келадиган бўлса, "канонирлар"нинг "уй-сафар" баҳсларининг ўрни алмаштирилади. Бундай қоидага ярим финал босқичида ҳам амал қилиниши мумкин.

— Чорак финал босқичи қуръасидан сўнг дарҳол ярим финалга ҳам қуръа ташланади. Шундан сўнг Бокуда ўтадиган финал учрашувининг номинал мезбонини аниқлаш мақсадида ҳам қуръа ташланади.

Қуръани қаерда томоша қилиш мумкин?
Маросимни FUTBOL TV, шунингдек, Россиянинг МАТЧ ТВ, МАТЧ ФУТБОЛ 1 ва ЕВРОСПОРТ каналлари орқали томоша қилиш мумкин.

Ўйинлар қачон ўтказилади?
Чорак финалнинг дастлабки ўйинлари 11 апрель, жавоб баҳслари 18 апрель куни ўтказилади. Қуръадан сўнг тақвимнинг батафсил кўриниши эълон қилинади. Ярим финал ўйинлари 2 ва 9 май, финал эса 29 май куни Бокудаги "Олимпия" стадионида бўлиб ўтади.