«Ювентус» бош мураббийи Массимилиано Аллегри жамоа ҳужумчиси Криштиану Роналду ЕЧЛда дисквалификация қилиниши мумкинлиги ҳақидаги хабарларга ўз муносабатини билдириб ўтди.

«Роналду дисквалификация қилинади? Бундай бўлмайди. Мазкур гол нишонлашда ғайриоддий ҳеч нарса кўрмадим. Оддий эҳтирослар. Ҳеч қандай дисквалификация берилмайди», - деди Аллегри Football Italia нашрига берган интервьюсида.

Эслатиб ўтамиз, Криштиану Роналду Европа чемпионлар лигаси нимчорак финал босқичи доирасида бўлиб ўтган «Атлетико»га қарши ўйинда рақиб жамоа бош мураббийи Диего Симеоненинг биринчи ўйинда қилган қилиғини такрорлади. Мазкур иш учун УЕФА Симеонени 20 минг евро миқдорида жаримага тортганди.

«Атлетико»нинг фикрича, Роналду қилган иш Симеоненикига нисбатан оғирроқ. Боиси, аргентиналик мураббий голни нишонлаш пайтида ўз мухлисларига қараб турган бўлса, «Ювентус» ҳужумчиси бу ишни мадридликлар мухлисларга қараб туриб қилди. Бундан ташқари, португалиялик футболчи учинчи голни уришдан олдин «Атлетико»мухлисларига қарата сўкингани видеокамераларга тушиб қолган. Агар УЕФА Криштиануга қарши иш очса, футболчи ҳам Симеоне каби жаримага тортилиши мумкин.

Бундан ташқари, агар УЕФА португалиялик футболчининг ҳаракатларини зўравонликка ундаш деб ҳисобласа, Роналду бир ўйиндан 3та ўйингача дисквалификация қилиниши мумкин.