«Frans Footbal» нашри томонидан ташкил қилинган «Олтин тўп» лойиҳаси шу қадар оммалашиб кетди-ки,  у футболчилар учун биринчи рақамли совринга айланиб улгурди. Бугун ушбу нуфузли совринга бу мавсумдаги асосий даъвогарлар ҳақида сўз боради

Киллиан Мбаппе

20 ёшидаёқ футбол оламини ўзига қарата олган футболчи ўзининг фантастик ўйинлари билан ҳаммани ҳайратда қолдириб келмоқда. Бу мавсумда у «Лига 1»  тўпурарлар пойгасида қолганлардан анча илгарилаб кетди. Унинг сермахсуллиги борасида гап-сўз бўлиши мумкин эмас.Ундаги тезлик, ўйинни ўқий олиш ҳислатлари унча-мунча тажрибали футболчиларни ҳавасини келтирмоқда. Боз устига, «Реал Мадрид» томонидан билдирилаётган қизиқиш унинг бу курашга бежиз кирмаганини кўрсатади. Афсуски, «ПСЖ» ўз хатолари туфайли ЙЧЛдан чиқиб кетди. Кўпчилик унинг ўтган йили Мундиалдаги ғалабасидан сўнг совринни қўлга киритишини кутган эди, аммо кутилмаганда Модрич катта саҳнага чиқди ва уни совринсиз қолдирди. Якунланаётган мавсумда ЙЧЛдан бошқа катта турнир йўқ эканлигини ҳисобга олсак, катта эҳтимол билан Мбаппе кучли учликдан нарига ўта олмайди.

Роналду

Португалиялик  футболчи «Италия  А»сериясига кўчиб ўтганида кўпчилик унинг кариерасида пасайиш кузатилишини тахмин қилган эди. Аксинча, Криш энди  иккинчи ёшлигини ўтказмоқда. Тактика ва стратегия устаси саналадиган Алегри Ронига ўз тактикасидан жой топди ва ундан унумли фойдаланишни бошлаб юборди. Роналду ўз устида тинимсиз ишлаши туфайли 34 ёшида ҳам ажойиб спорт формасини ушлаб турибди. Бу мавсум улар ички чемпионатда ғолиб чиқишлари тобора ойдинлашиб бормоқда. Бундан ташқари Рони тўпурарлар пойгасида ҳам чакки кўринмаяти.  Устига-устак ЙЧЛдаги «Атлетико Мадрид»га қарши турнирда кечган учрашувдаги хет-трик унинг бу мавсумда 6-бор «Олтин тўп»ни қўлга киритиши мумкин эканлигини яна бир бор ҳаммага намоён қилди.

Месси

Аргентиналик болакай ҳам ҳаш-паш дегунча 32 ёшни қоралаб қўйди. Унинг аввалги ёриб киришлари ва тезкор ҳаракатлари бироз камайган бўлсада, Месси ўз позициясини ўзгартириш орқали вазиятни ижобий ҳал қилди. У эндиликда «Барселона» ҳужумларини бошлаб бермоқда. Янги амплуада Месси ўзини жуда яхши ҳис қилмоқда. Бу мавсумда «Ла Лига»да чемпионликни деярли нақд қилиб қўйган «Барса» катта эътиборини ЙЧЛга қаратиши аниқ. Месси бу мавсумни сермахсул ўтказмоқда. «Олтин тўп» учун курашда бу жиҳат ўта муҳим. Агар у шу темпни мавсум сўнгигача ушлаб қолишни уддасидан чиқа олса, «Олтин тўп» учун Мессида яхшигина имконият мавжуд.

Бу футболчилардан ташқари Серхио Агуэро, Виржил Ван Дейк, Муҳаммад Салоҳ сингари футболчиларда «Олтин тўп» учун курашиш имконияти мавжуд. Бу футболчилардан бири совринга эга чиқиши учун биринчи навбатда ЙЧЛда ғолиб бўлиши керак. Акс холда, клублар ўртасидаги энг нуфузли совриндан қуруқ қолган футболчилар бу курашда ғолиб бўлишлари,  қайдам…