«Frans Footbal» nashri tomonidan tashkil qilingan «Oltin to‘p» loyihasi shu qadar ommalashib ketdi-ki, u futbolchilar uchun birinchi raqamli sovringa aylanib ulgurdi. Bugun ushbu nufuzli sovringa bu mavsumdagi asosiy da’vogarlar haqida so‘z boradi
Killian Mbappe
20 yoshidayoq futbol olamini o‘ziga qarata olgan futbolchi o‘zining fantastik o‘yinlari bilan hammani hayratda qoldirib kelmoqda. Bu mavsumda u «Liga 1» to‘purarlar poygasida qolganlardan ancha ilgarilab ketdi. Uning sermaxsulligi borasida gap-so‘z bo‘lishi mumkin emas.Undagi tezlik, o‘yinni o‘qiy olish hislatlari uncha-muncha tajribali futbolchilarni havasini keltirmoqda. Boz ustiga, «Real Madrid» tomonidan bildirilayotgan qiziqish uning bu kurashga bejiz kirmaganini ko‘rsatadi. Afsuski, «PSJ» o‘z xatolari tufayli YCHLdan chiqib ketdi. Ko‘pchilik uning o‘tgan yili Mundialdagi g‘alabasidan so‘ng sovrinni qo‘lga kiritishini kutgan edi, ammo kutilmaganda Modrich katta sahnaga chiqdi va uni sovrinsiz qoldirdi. Yakunlanayotgan mavsumda YCHLdan boshqa katta turnir yo‘q ekanligini hisobga olsak, katta ehtimol bilan Mbappe kuchli uchlikdan nariga o‘ta olmaydi.
Ronaldu
Portugaliyalik futbolchi «Italiya A»seriyasiga ko‘chib o‘tganida ko‘pchilik uning kariyerasida pasayish kuzatilishini taxmin qilgan edi. Aksincha, Krish endi ikkinchi yoshligini o‘tkazmoqda. Taktika va strategiya ustasi sanaladigan Alegri Roniga o‘z taktikasidan joy topdi va undan unumli foydalanishni boshlab yubordi. Ronaldu o‘z ustida tinimsiz ishlashi tufayli 34 yoshida ham ajoyib sport formasini ushlab turibdi. Bu mavsum ular ichki chempionatda g‘olib chiqishlari tobora oydinlashib bormoqda. Bundan tashqari Roni to‘purarlar poygasida ham chakki ko‘rinmayati. Ustiga-ustak YCHLdagi «Atletiko Madrid»ga qarshi turnirda kechgan uchrashuvdagi xet-trik uning bu mavsumda 6-bor «Oltin to‘p»ni qo‘lga kiritishi mumkin ekanligini yana bir bor hammaga namoyon qildi.
Messi
Argentinalik bolakay ham hash-pash deguncha 32 yoshni qoralab qo‘ydi. Uning avvalgi yorib kirishlari va tezkor harakatlari biroz kamaygan bo‘lsada, Messi o‘z pozisiyasini o‘zgartirish orqali vaziyatni ijobiy hal qildi. U endilikda «Barselona» hujumlarini boshlab bermoqda. Yangi ampluada Messi o‘zini juda yaxshi his qilmoqda. Bu mavsumda «La Liga»da chempionlikni deyarli naqd qilib qo‘ygan «Barsa» katta e’tiborini YCHLga qaratishi aniq. Messi bu mavsumni sermaxsul o‘tkazmoqda. «Oltin to‘p» uchun kurashda bu jihat o‘ta muhim. Agar u shu tempni mavsum so‘ngigacha ushlab qolishni uddasidan chiqa olsa, «Oltin to‘p» uchun Messida yaxshigina imkoniyat mavjud.
Bu futbolchilardan tashqari Serxio Aguero, Virjil Van Deyk, Muhammad Saloh singari futbolchilarda «Oltin to‘p» uchun kurashish imkoniyati mavjud. Bu futbolchilardan biri sovringa ega chiqishi uchun birinchi navbatda YCHLda g‘olib bo‘lishi kerak. Aks xolda, klublar o‘rtasidagi eng nufuzli sovrindan quruq qolgan futbolchilar bu kurashda g‘olib bo‘lishlari, qaydam…
