Россия термаси аъзоси, айни пайт ижара асосида «Валенсия» клубида тўп сураётган Денис Черишев россиялик ҳам-касбларимиз билан суҳбатда «Реал»даги фаолияти, миллий жамоадаги ўзгаришлар ва мураббийлари ҳақида сўз юритди.
Собиқ клубдошлари ҳақида
- 11 ёшлигимда бўш вақтимни Начо Фернандес ва Маркос Алонсо билан бирга ўтказардим. Ҳозир кам кўришамиз, асосан бир-биримизни туғилган кун билан табриклаймиз. Яқинда Начо ўғил фарзандли бўлганида, унга ёзгандим. Умуман, майдонда тўқнаш келганимизда гаплашамиз. Телефонимдаги рўйхатда рақами бор энг ёрқин юлдуз - Лука Модрич. Уни «Олтин тўп» соҳиби бўлгани билан табриклаганимда, у ҳам жавоб ёзганди.
Отаси ҳақида
- Испанияга борганимда, отам Хихоннинг «Спортинг» клубида ўйнарди, мен ҳам шу жамоада машғулотларни бошлаганман. Отам менга ёрдам бериш учун фаолиятини эртароқ тугатгани - бор гап. Айнан унинг саъй-ҳаракатлари туфайли фаолиятимни йўлга қўйдим. Мени «Реал»га чақиришганида, отам 33 ёшда эди, унга Ла Лига ва Сегундадан таклифлар тушганди. У мураббийликка ўқишни хоҳлади, аммо менинг ўйиним яхши чиқиши учун ўз фаолиятидан воз кечди. Дастлаб Мадридга якка ўзим боришим мумкин эди, бироқ 11 ёшда эканлигимни инобатга олиб, ота-онам бирга яшашимиз керак деган хулосага келишди. Хайриятки, ҳаммасини уддаладик.
«Реал»дан таклиф олгани ҳақида
- Отамга Хихондан Мадридгача бўлган 500 километр масофани яёв босиб ўтишим мумкинлигини айтгандим. «Реал»даги илк куним ёдимда, автобусда кетаётганда ўйланиб қолгандим: «Энг яхши 11 футболчи шу ерга тўпланган бўлса керак». Аввалига бироз асабийлашганман, аммо тўпни менга беришганида, ҳаммасини унутганман.
Ҳали Россияга қайтмайди
- Зобнин ва Кутёпов «Спартак»ка чақиришди, ҳазил тариқасида. Ўйлашимча, ҳали қайтишга эрта. Кучли чемпионатларда янада ривожланиш учун кучим етади, деб ҳисоблайман. Ла Лига - топ чемпионатлардан бири, у ерда ўзимни жуда яхши ҳис қиляпман.
Роналду ҳақида
- У ҳамиша машғулот ўтказарди, ҳаттоки, уйида ҳам. Тонгги соат 3-4ларда қаергадир борсак, муздеккина сувга тушиб, тикланарди. Ҳақиқий профессионал. Роналду билан бирга ўйнаётганимизда, Ирина Шейк билан учрашиб юрарди, кўпинча рус сўзлардан фойдаланарди: «вилка», «ложка»...
Моуриньоми, Зиданми ёки Черчесов?
- Сўзсиз Станислав Саламовични танлайман. У термага чақирилмаганимда ҳам мен билан алоқани узмаганди. «Вильярреал»да кам ўйнаётганимни ўзим ҳам тушуниб турардим. Аммо у барибир қўнғироқ қилиб, ўзимни қандай сезаётганим билан қизиқарди.
Мундиалдаги иштироки ҳақида
- Мен нима қилдим? Ҳеч нима. Жаҳон чемпионати ажойиб ўтди, аммо буни бир четга суриб, изланишда давом этиш керак. Олдинда Евро саралашидаги муҳим ўйинлар кутмоқда.
ЖЧдаги Россия термасининг сири нимада?
- Черчесов финалга етиб боришимизга охиригача ишонди. У билан ўтказган ҳар бир кунимизда биз ҳам бунга ишона бошладик. Гуруҳдан чиққанимизда, жуда қувондик, аммо мураббий шундай деди: «Бу бошланиши, холос, олдинга интилишда давом этишимиз керак». Ҳар қандай рақибни енга олишимизга, мураббийга ишондик, у эса бизга ишонди. Эсимда, Мисрга қарши баҳсдаги ғалабадан кейин отам билан бирга тушлик қилдик. Авваллари ўйиним қовушмаганини эсладик, ҳозир ҳаммаси бошқача эканидан қувондик.
Россияликлардан қайси бири «Реал» даражасига чиқа олади?
- Головин, Ахметов. Улар уддалашади, фақат имконият берилса, бас. Ўйлашимча, термамиздагилардан биринчи бўлиб Европага йўл оладиганлар - Зобнин ва Фернандес. Романинг қилаётган ишларини кўриб, ҳар қандай чемпионатда ўйнаб кетишига кўзим етади.
«Реал»дан кетгани айни муддао
- Денис жаҳон чемпионатидаги иштирокдан роҳат олди. Агар «Реал»дан кетмаганида, бундай шарафга муяссар бўлармиди, номаълум, - дейди Дмитрий Черишев. - Стас Черчесов фақат ўйин амалиёти кўпроқ ўйинчиларни танлайди. Денис ҳам улардан бири эди, кўп гол ураётганди. Шундай экан, «Қироллик клуби»ни тарк этгани учун мундиалда қатнашиш имконияти туғилди, дейиш мумкин.
