Бугун мамлакат миллий чемпионати – Суперлигада 2-тур учрашувлари давом эттирилади.
Бироздан сўнг Термизда Суперлига дебютантлари – “Сурхон” ва “Динамо” ўзаро куч синашса, соат 19:00 да Тошкентда мухлислар “Локомотив” – “Навбаҳор” учрашувининг гувоҳи бўлишади.
Кеча ҳам Ўзбекистон Суперлигаси 2-турида иккита ўйин бўлиб ўтган эди. "Меаллург" Бекободда "Бухоро"ни 2:0 ҳисобида доғда қолдирганлигини яхши биласиз. Ундан олдинроқ эса Навоийда “Қизилқум” пойтахт вилоятининг бошқа бир жамоаси – АГМКни икки тўп фарқи билан мағлуб этди – 3:1.
Кечаги ўйинларга оид қизиқарли маълумотлар: даставвал "Металлург"га тегишлиларига тўхталсак.
Россиялик легионер Сергей Тумасян Ўзбекистон чемпионатидаги илк голини киритди. Тажрибали Сервер Жепаров эса миллий чемпионатимиздаги голлари сонини 98 тага етказиб олди.
Унинг умуман мамлакатимиз клублари сафида киритган барча голлари сони (Ўзбекистон чемпионати, кубоги, терма жамоа ва клублар сафида халқаро майдонларда киритган голлари) 165-тага етди. Бундан ташқари Сервер Жепаров 2 йилу, 7 ой ва 21 кундан (ёки 963 кун) сўнг яна Ўзбекистон чемпионатида тўп киритишга муваффақ бўлди. Сервер сўнгги марта 2016 йил 8 август куни "Локомотив" сафида "Андижон" дарвозасига гол урган эди.
