“Навбаҳор” ҳимоячиси Обид Жўрабоев Суперлига 2-тури доирасидаги “Локомотив” қарши кечган баҳсда жароҳат олган.
Унинг қачон сафга қайтиши ва айни дамдаги қандай ҳолатда эканлиги ҳақида футболчининг ўзи маълумот берди.
“Локомотив”га қарши кечган баҳсда майдонга катта иштиёқ ва ғайрат билан тушгандим. Афсуски, жароҳат олганлигим боис.
15-дақиқадаёқ алиштирилдим. Жамоадошларимга муҳим ўйинда ёрдам беролмаслигимни билиб, майдонни кўзда ёш билан тарк этдим.
“Темирйўлчилар” билан бўлган баҳсда жамоамиз ажойиб ўйин намойиш этган бўлса-да, аламли тарзда мағлубиятга учради.
Энди кейинги “Бунёдкор”га қарши кечадиган ўйинда зафар қучишга ҳаракат қиламиз.
Жароҳатим борасида тўхталадиган бўлсам, Худога шукр, шифокорларнинг фикрича, унчалик хавфли эмас экан. Эртадан якка ҳолда машқларни бажарсам, 3 апрелдан умумий машғулотларга қўшиламан. Худо хоҳласа, 6 апрель куни “Бунёдкор” билан бўладиган ўйинда майдонга тушаман, деган умиддаман”, - деди Обид Жўрабоев.
