“Навбаҳор” ярим ҳимоячи Абдужамол Исроилов “Бунёдкор”га қарши ўйин олдидан фикрларини билдириб ўтди. 

“Машғулотлар ўзгача руҳда, европача услубда кечмоқда. Унда барчамиз астойдил иштирок этяпмиз. Олдинги турлардаги “Қўқон-1912” ва “Локомотив” клубларига қарши кечган баҳсларда ғалаба қозона олмадик. 

Энди 6 апрель куни “Бунёдкор”га қарши кечадиган ўйинда зафар қучиш, мухлисларга қувонч улашиш учун барча маҳоратимизни ишга соламиз. 

Фурсати келганида таъкидлаш жоизки, “қалдирғочлар” билан бўладиган баҳс Фарғонадаги “Истиқлол” стадионида кечаётгани, ушбу ўйингоҳга яна қайтаётганимдан хурсандман. 

Боиси, аввалги мавсумларда Фарғонанинг “Нефтчи” жамоаси таркибида 1,5 йил ўйнаганман ҳамда ушбу ўйингоҳ мен учун анча қадрдон. Шунинг учун “Навбаҳор”нинг жорий мавсумдаги илк

ғалабасини менга қадрли бўлган стадионда нишонласак, янада ёқимли ва қувончли бўларди. Илоҳим, мен учун қадрли ўйингоҳ бўлган “Истиқлол” бизга омад келтирсин!

Жамоамиз мухлисларини 6 апрель кунги ўйинга таклиф этаман. Сиз азиз мухлисларнинг қўллаб-қувватлашлари бизга руҳий куч-қувват ҳамда зафар қучиш учун мадад беради. Келаётган шанба оқшомида бу йилги илк ғалабамизни биргаликда нишонлаш барчамизга насиб этсин, илоҳим!”, - дейди Исроилов.