Халқаро футбол ассоциациялари федерацияси (ФИФА) бугун жаҳон терма жамоаларининг янги рейтингини эълон қилди. Унга кўра, Ўзбекистон терма жамоаси ўтган ой рейтингига нисбатан 4 ўрин юқорилаб, 85-поғонага чиқиб олди.


Терма жамоамиз март ойидаги ФИФА кунлари доирасида "China cup-2019" мусобақасида иштирок этиб, Уругвайга ютқазди ва Хитойни мағлуб этди. Натижада рейтингда ҳисобимизга 4 балл қўшилди — 1279 балл.

Осиё минтақада Ўзбекистон 11-ўринни эгаллаб турибди. Эрон терма жамоаси 1516 балл билан умумий рейтингда 21-поғонани банд этган ҳолда, қитъанинг энг яхши жамоаси бўлиб турибди. Кейин ўринларни Япония (26-ўрин), Жанубий Корея (37), Австралия (41) ва Қатар (55) эгаллаб турибди.

Рейтингни эса ҳамон Бельгия терма жамоаси бошқариб турибди. Кучли учликка кирган Франция ва Бразилия термалари ушбу ойда ўз ўринларини ўзгартиришмади. Англия эса Хорватиядан ўтиб кетиб, 4-қаторга чиқиб олди.

Рейтингнинг тўлиқ кўриниши билан ФИФА расмий сайтида танишиб олиш мумкин.