Бугунги кунимиз деярли «Пахтакор» клуби билан ўтди десак, адашмаган бўламиз. Жамоанинг ўйин олди машғулотларидан сўнг ўзбек футболининг энг ёрқин юлдузи, дўстимиз - Жалолиддин Машариповни суҳбатга тортдик.
Эртанги учрашув олдидан фикрларингиз билан ўртоқлашсангиз
Бизни эртага ўта муҳим учрашув кутиб турибди. Эртанги ғалаба гуруҳдан чиқишимиз учун замин яратиб бериши мумкин. Шу сабаб ушбу учрашувда ғалаба қозонишга ҳаракат қиламиз.
Бугун матбуот анжуманида асосий мавзу Хавининг майдонга тушиш, ёки тушмаслиги тўғрисида борди. Таркибида Хави ва Габи бор жамоа Осийининг ҳар қандай клуби учун қийинчилик туғдира оладими?
Албатта, бу икки буюк футболчининг майдонда бор эканлиги рақибларда қўрқув ҳиссини уйғотиши мумкин, лекин биз учун эмас. Агар уларнинг мухлислари бизда Хави бор деб мақтанган бўлса, сизлар ҳам бизда Жалол бор деб мақтанмадингларми? (кулади)
Эртанги учрашувгача Аъзамов ва Симич жароҳатидан қутулиб сафга қайитиши мумкинми?
Симич жароҳатдан тўлиқ қутулганича йўқ. Шерзод бугун кўрганингиздек, асосий гуруҳ билан биргаликда машғулот ўтказди. Насиб қилса, уни эртага майдонда кўрасизлар.
Эртанги муҳим учрашув олдидан мухлисларга мурожаатингиз бўлса, марҳамат
Мен улардан эртага майдонга келиб қўллаб-қувватлаб туришларини илтимос қилган бўлар эдим. Бизга ҳар доимгиданда кўпроқ кераксизлар.
