Жорий йил 10-12 апрель кунлари Таиланднинг Чанг Майи шаҳрида Жиу-житсу бўйича талабалар ўртасида Жаҳон кубоги баҳслари бўлиб ўтди.   Халқаро Жиу-житсу федерацияси (IJJF) ҳамда Халқаро университет спорт федерацияси (FISU) ташаббуси билан ташкил этилган спорт байрамида дунёнинг 20га яқин давлати спортчи талабалари иштирок этди.   Қувонарлиси, Ўзбекистон Жиу-житсу федерацияси мазкур нуфузли мусобақада илк бора қатнашган бўлишига қарамай энг яхши натижага эришди.   Ne Waza, Fighting, Duo system йўналишларида бўлиб ўтган муросасиз баҳслар якунида Умид Набиев, Феруз Усмонов, Нозимжон Одилов, Камолиддин Анорқулов, Азизбек Тоҳиров, Умид Раҳимовлар терма жамоамиз ҳисобига 6 та олтин медални қўшиб қўйди. Шунингдек, яна 4та кумуш ва 5та бронза медалига сазовор бўлган вакилларимиз умумжамоа ҳисобида фахрли 2-ўриндан жой олди.   Мезбонлар 1-ўринни, қозоғистонлик жиу-житсучилар эса 3-ўринни қўлга киритди.   Спортчиларимиз 16 апрель куни Ислом Каримов номидаги Тошкент халқаро аэропортида кутиб олинади.