Европа чемпионлар лигасида ярим финалга йўл олган дастлабки жамоанинг номи аниқ бўлди.

"Барселона" клуби чорак финалда "Манчестер Юнайтед"га қарши иккита баҳсда рақибдан устун келди. Айниқса, бугунги жавоб ўйинида "кўк-анорранглилар" йирик ҳисобда ғалаба қозонишди.

"Камп Ноу"даги ўйин бутунлай бошқача сценарий остида ўтиши мумкин эди, агар баҳснинг биринчи дақиқасида Рэшфорд имкониятдан самарали фойдалана олганида. Ҳужумчи Погбанинг узатмасидан кейин дарвозабон билан яккама-якка вазиятга чиқиб бориб, зарба йўллади. Тўп тўсинга тегиб, юқорига кўтарилиб кетди.

Шундан сўнг "кўк-анорранглилар" рақибнинг хатоларини шафқатсизларча жазолай бошлади. Месси ўнг қанотда Эшли Янгдан тўпни олиб қўйиб, бироз марказ томон сурилди ва ўз услубида зарба бериб, тўпни дарвоза бурчагига жойлаб қўйди. Орадан 4 дақиқа ўтиб Давид де Хеа "қовун туширди". Майдон эгалари яна рақиб футболчиларидан тўпни олиб қўйишди ва Лионель жарима майдончаси ярим айланаси ичида ўнг оёқда унчалик кучли бўлмаган зарба берди. Дарвозабон тўпни қўлтиқлари орасидан ўтказиб юборди.

"Барселона" биринчи бўлим сўнгида учинчи голни уриши мумкин эди, аммо сўнгги паллада Де Хеа ва ҳимоячи жамоани муқаррар голдан қутқариб қолишди. Шунга қарамай, майдон эгалари иккинчи бўлимда учинчи тўпни киритишди. Филиппе Коутиньо олис масофадан йўллаган зарбани "МЮ" посбони қайтара олмади.

Шу тариқа, "Барселона" ярим финал йўлланмасини қўлга киритди. Жамоа финал йўлланмаси учун курашда "Ливерпуль" - "Порту" жуфтлиги ғолибига қарши майдонга тушади.

Европа чемпионлар лигаси, чорак финал, жавоб ўйини
Барселона Испания – Манчестер Юнайтед Англия 3:0 (2:0)
Голлар: 1:0 – 16 Месси, 2:0 – 20 Месси, 3:0 – 61 Коутиньо.
Барселона – тер Штеген, Пике, Альба, Серджи Роберто (Нелсон Семеду, 71), Лангле, Ракитич, Бускетс, Артур (Видаль, 75), Коутиньо (Дембеле, 81), Месси, Суарес.
Манчестер Юнайтед – Де Хеа, Смоллинг, Янг, Джонс, Линделеф, Лингард (Санчес, 80), Фред, Погба, Мактомини, Марсьяль (Диогу Далот, 65), Рэшфорд (Лукаку, 73).
Огоҳлантириш: Суарес (77).
Биринчи ўйин – 1:0