"Аталанта" клуби учун ушбу мавсум анча муваффақиятли кечмоқда. Жамоа А серияда 4-ўринда бораётган бўлса, Италия кубогида эса финал йўлланмасини қўлга киритди.

Кубокнинг ярим финал жавоб ўйинини бергамоликлар "Фиорентина"га қарши ўз уйларида ўтказишди. Меҳмонлар 3-дақиқадаёқ ҳисобни очишга муваффақ бўлишди. Орадан 11 дақиқа ўтиб майдон эгалари ҳисобни тенглаштиришди. Иккинчи бўлимда эса "Аталанта" яна битта гол урди ва ғалабани ўз томонига оғдирди.

"Фиорентина" майдонида ўтказилган дастлабки ўйинда 3:3 ҳисоби қайд этилган эди. Шу тариқа, "Аталанта" 23 йил деганда Италия кубоги финалига чиқди. Умуман олганда, жамоа ўз тарихида 4 марта финал йўлланмасини қўлга киритди. Клуб бир марта — 1962/63 йилги мавсумда ушбу совринни қўлга киритган. "Аталанта" финалда "Лацио"га қарши майдонга чиқади.

Италия кубоги, ярим финал, жавоб ўйини
Аталанта – Фиорентина 2:1 (1:1, 1:0)
Голлар: 0:1 – 3 Муриэль, 1:1 – 14, пенальти Иличич, 2:1 – 69 Гомес.
Аталанта – Голлини, Госенс (Пессина, 90), Паломино, Гимшити, Масьелло, Иличич (Манчини, 85), Фройлер (Пашалич, 58), Гомес, де Рон, Кастань, Сапата.
Фиорентина – Лафон, Чеккерини, Миленкович, Бираги, Пеццелья, Жерсон (Дабо, 65), Бенасси (Симеоне, 79), Кьеза, Верету, Миральяс (Фернандеш, 88), Муриэль.
Огоҳлантиришлар: Чеккерини (16), Пеццелья (72), Госенс (73), Миральяс (80).
Биринчи ўйин — 3:3.