Англия чемпионшипининг 45-туридан ўрин олган “Лидс” ҳамда “Астон Вилла” жамоалари ўртасидаги ўйин (1:1) да жуда ҳам ноодатий воқеа юз берди.

Гап шундаки, ўйиннинг 72-дақиқасида “Астон Вилла” клуби футболчиларидан бирига қўполлик ишлатилди ва у майдонга йиқилишга мажбур бўлди.

Ҳакам эса ўйинни тўхтатмасликка қарор қилди, “Лидс” футболчилари бўлса, фэйр-плей қоидаларига амал қилмай тўпни аутга чиқариб юбормасдан, яна ҳужумни давом эттириб, натижада гол уришди.

Гол урилган вазиятдан сўнг икки жамоа футболчилари ўртасида катта жанжал содир бўлди. Ҳакам “Астон Вилла” ҳужумчиси Анвар Ал Ғазига қизил карточка кўрсатишга мажбур бўлди.

Бундай ғалати ҳодисадан сўнг “Лидс” мураббийи Марсело Бьелса футболчиларига “Астон Вилла” гол уриб ҳисобни тенглаштириб олиши учун қаршилиик кўрсатмасликка чақирди. Марсело Бьелса ҳақиқат тарафдори эканлигини ҳаммага кўрсатиб қўйди. Ушбу ўйин 1:1 ҳисоби билан якунига етди.