Европа лигаси мусобақасида финалга чиққан жамоалар номи аниқ бўлди. Испаниянинг "Валенсия" клуби ўз майдонида "Арсенал"ни қабул қилди.

Испаниялар ўйинни фаол бошлаб, баҳснинг 11-дақиқасидаёқ ҳисобни очишди. Кейинги 3-4 дақиқа ичида "кўршапалаклар" иккита ўта хавфли вазият яратишди. Аммо улар вазиятни голга айлантира олишмади. Учрашувнинг 17-дақиқасида эса "канонирлар" кутилмаганда ҳисобни тенглаштиришди: Чех тепиб берган тўп учун курашда меҳмонлар рақиб жарима майдончаси атрофида ғолиб чиқишди ва Обамеянг дарвозани ишғол қилди. Мазкур гол "Валенсия"нинг шаштини анча пасайтириб қўйди.

Майдон эгалари иккинчи таймни ҳам фаол бошлашдию, аммо ўз дарвозаларидан тўп олиб чиқишди. Ушбу гол амалда тўқнашув тақдирини ҳал қилиб қўйди. "Валенсия" тезда ҳисобни тенглаштирган бўлса-да, улар қолган дақиқаларда 3та тўп кирита олишмасди. Боз устига, "канонирлар" яна иккита гол уриб, сафарда ҳам ғалаба қозонишди.

Пьер-Эмерик Обамеянг бу баҳсда 3та гол уриб, "Арсенал" тарихида еврокубокларнинг ярим финал босқичида "хет-трик" қайд этган илк футболчига айланди.

Европа лигаси. 1/2 финал, жавоб ўйини
Валенсия Испания – Арсенал Англия 2:4 (1:1, 1:3)
Голлар: 1:0 – 11 Гамейро, 1:1 – 17 Обамеянг, 1:2 – 50 Ляказетт, 2:2 – 58 Гамейро, 2:3 – 69 Обамеянг, 2:4 – 88 Обамеянг.
Валенсия – Нето, Гарай, Гайя, Пиччини (Солер, 56), Габриэл, Васс, Парехо, Коклен, Гедеш (Ферран Торрес, 71), Родриго (Санти Мина, 72), Гамейро.
Арсенал – Чех, Косьельни, Монреаль, Колашинац (Мустафи, 71), Папастатопулос, Торрейра (Гендузи, 80), Мэйтленд-Найлз, Жака, Ўзил (Мхитарян, 62), Ляказетт, Обамеянг.
Огоҳлантиришлар: Гарай (38), Гайя (43), Озил (62).
Дастлабки ўйин: 1:3