«Манчестер Юнайтед» клуби Англия чемпионатининг ушбу мавсумида 6-ўринни эгаллаб, келаси мавсумда Европа лигаси мусобақасида иштирок этадиган бўлди. Хўш, Сульшер шогирдлари мусобақани қайси босқичдан бошлайди?

Барчаси «Манчестер Сити» ва «Уотфорд» ўртасидаги Англия кубоги финал баҳси натижасига боғлиқ.

1) Мазкур ўйинда «Уотфорд» ғалаба қозонса, жамоа Европа лигаси йўлланмасини қўлга киритади ва АПЛдан мусобақада иштирок этадиган иккинчи рақамли жамоа сифатида турнирни гуруҳ босқичидан бошлайди. Бундай ҳолатда "МЮ" Европа лигасининг 2-саралаш босқичидан ўзи иштирокини бошлашга мажбур бўлади. Бу босқичнинг дастлабки ўйинлари 25 июль кунига белгиланган. Шу тариқа, манкунианликлар Европа лигаси гуруҳ босқичи йўлланмасини қўлга киритиш учун 3та босқичдан ўтишларига тўғри келади.

2) Англия кубоги финалида «Сити» ғалаба қозонса, «Манчестер Юнайтед» клуби Европа лигасини дарҳол гуруҳ босқичидан бошлайди. У ҳолда «Уотфорд» Европа лигаси йўлланмасидан маҳрум бўлади. АПЛда 7-ўринни эгаллаган «Вулверхэмптон» Европа лигаси йўлланмасига эга бўлади ва юқоридаги ёзилган "МЮ" йўлини босиб ўтиши керак бўлади.

Дарвоқе, дастлабки режага кўра, «Юнайтед» мавсумга тайёргарлик доирасидаги дастлабки назорат ўйинини 25 июль куни «Тоттенхэм»га қарши Шанхай шаҳрида ўтказиши керак. Бундан ташқари, "МЮ" 3 август куни Кардифф шаҳрида «Милан»га қарши ўртоқлик ўйини ўтказишни белгилаб олган. АПЛнинг 2019/20 йилги мавсуми эса 10 август куни старт олади.

Англия кубоги финали доирасидаги «Манчестер Сити» – «Уотфорд» учрашуви 18 май куни Тошкент вақти билан 21:00да бошланади.