3 июнь “Халқаро велосипед куни” куни муносабати билан бугун пойтахтимизда велоспорт бўйича марафон ўтказилди. “Ҳумо арена” спорт мажмуасининг ёнидан старт олган веломарафон пойтахтимизнинг “Бешёғоч”, “Фурқат”, “Ислом Каримов”, “Шароф Рашидов” ва “Афросиёб” кўчалари бўйлаб жами 5 километр масофада ташкил қилинди.
“Бугун бизнинг спортимиз учун байрам. Барчамиз “Халқаро велосипед куни”ни Ўзбекистонда нишонлаш учун жам бўлдик. Юртимизда ушбу спортга бўлган қизиқиш тобора ортиб бормоқда. Жорий йилнинг апрель ойида Тошкент велоспортнинг шоссе йўналиши бўйича Осиё чемпионатига мезбонлик қилди. Мазкур мусобақада қатнашган терма жамоамиз вакиллари кўплаб медалларни қўлга киритишди. Барчангизга соғлик-саломатлик тилаган ҳолда марафон иштирокчиларига омад тилайман”, – деди Танзила Норбоева.
Мусобақа якунида велоспорт кунида ва соғлом турмуш тарзини тарғиб қилишда қўшган хиссаси учун барча иштирокчиларга сертификатлар тақдим этилди.
