Ўзбекистон миллий терма жамоаси ярим ҳимоячиси Икром Алибоев 2019 йил аввалида “Локомотив”дан Жанубий Кореянинг “Сеул” клуби сафига бориб қўшилди.

Айни пайтга келиб маҳоратли футболчи корейс клуби таркибида 15 та баҳсда майдонга тушиб, 2 бора рақиблари дарвозасини ишғол этишга ҳам муваффақ бўлди. Қолаверса, жамоадошларини 3 марта голли узатма билан таъминлаб,

25 ёшли футболчи “Сеул” клубидаги фаолияти қандай кетаётгани хусусида ЎФА матбуот хизматига гапириб берди:

- “Сеул” жамоасидаги ишларим аъло даражада кетмоқда, десам ҳам бўлади. Жамоа мураббийи доим ишонч билдирмоқда. Қолаверса, жамоамиз юқори ўринлар учун кураш олиб бормоқда.

Ўзбек ва корейс футболини солиштирсам, бу ерда футбол анча тезроқ. Шу боисдан илк учрашувларда темпга киришиб кетиш осон бўлгани йўқ. Лекин жамоадошларим ҳамда мухлислар ҳамиша қўллаб-қувватлаб туришди ва айни пайтга келиб Корея К-лигасига анча мослашдим, дея оламан.

"Сеул" ФК ўз олдига фақат ва фақат олий мақсадларни қўяди. Шу боис мен ҳам худди Сервер Жепаров сингари ушбу жамоа билан Корея чемпиони бўлиш истагидаман, - деди футболчи.

Таъкидлаш жоиз, ҳамюртимиз Сервер Жепаров ҳам 2010-2011 йилларда “Сеул” клуби шарафини ҳимоя қилган ва мазкур клуб сафида Жанубий Корея чемпионига айланган.