Coca Cola Суперлигаси 13-тур доирасидан ўрин олган “Қўқон-1912” – “Пахтакор” учрашуви 29 июнь куни Қўқон шаҳрида бўлиб ўтади. Мазкур баҳс олдидан ушбу жамоаларнинг ўзаро ўйинлардаги статистик маълумотлари билан таништириб ўтамиз.
Ўзаро ўйинлар
Бу жамоалар шу пайтга қадар чемпионат доирасида 26 марта тўқнаш келишган.
Ўйинларнинг 5 тасида вакилларимиз зафар қучишган, 14 та баҳсда “Шерлар”нинг қўли баланд келган. Еттита учрашувда дуранг натижа қайд этилган.
Тўплар нисбати – 69-37, “Пахтакор” фойдасига. Ўзаро ўйинларда “Қўқон-1912” 22 очкони қўлга киритган. “Пахтакор”нинг очкоси 49 тани ташкил этади.
Қўқонда ўтган сўнгги бешта учрашув
12.08.2018 «Қўқон-1912» - «Пахтакор» 1:1
06.05.2017 «Қўқон-1912» - «Пахтакор» 1:1
08.08.2016 «Қўқон-1912» - «Пахтакор» 1:1
05.07.2015 «Қўқон-1912» - «Пахтакор» 2:2
02.11.2003 «Қўқон-1912» - «Пахтакор» 3:2
Факт: Қўқонда ўтказилган сўнгги бешта учрашувда “Пахтакор” футболчилари ғалаба қозона олишмаяпти.
Ҳакамлар
29 июнь куни Қўқондаги “Марказий” ўйингоҳда бўлиб ўтадиган “Қўқон-1912” – “Пахтакор” учрашувини Вадим Агишев бошчилигидаги ҳакамлар гуруҳи бошқариб боришади.
Coca-Cola Суперлига
13-тур
29 июнь
ҚЎҚОН-1912 - ПАХТАКОР
Ҳакамлар: Вадим Агишев, Расул Фозилов, Максим Нехочин, Ғайрат Жўраев
Назоратчи: Артём Арутюнов
Комиссар: Александр Давиденко
415-учрашув арафасида
«Қўқон-1912» жамоаси Ўзбекистон чемпионатларидаги 415-ўйинини ўтказиш арафасида турибди. 14-мавсум кучлилар сафида иштирок этаётган қўқонликлар шу кунга қадар 414 та учрашув ўтказишга муваффақ бўлишди.
Шуларнинг 146 тасида жамоамиз ғалаба қозонган. 65 учрашувда ғолиб номи аниқланмаган. 203 та ўйинда мағлубиятга учраган. Тўплар нисбати 550 – 755. Умумий очколар 503 тани ташкил этади.
Айтганча, Суҳроб Бердиевнинг “Сўғдиёна” дарвозасига киритган иккинчи голи жамоамизнинг миллий чемпионатлардаги 550-голи сифатида тарихда қоладиган бўлди.
Coca Cola Суперлигаси 13-тур доирасидаги “Пахтакор” билан бўладиган учрашув жамоамизнинг Ўзбекистон чемпионатлардаги 415-ўйини бўлади.
Бошланиш вақтлари
"Қўқон-1912" – “Пахтакор” учрашуви, шанба куни Қўқон шаҳридаги “Марказий” ўйингоҳда соат 18:00 да старт олади. Бугун эса ушбу жамоаларнинг ўринбосарлари U-21 биринчилиги 13-турида майдонга тушишади. Мазкур ўйин Учкўприкдаги “Марказий” стадионда соат 17:30да бошланади.
