Таиланднинг Чон Бури шаҳрида спорт курашлари бўйича ёшлар ўртасида Осиё чемпионати ўз ниҳоясига етди. Мусобақани эркин курашчилар баҳси якунлаб берди.
Қитъа биринчилигининг сўнгги кунида ҳам йигитларимизнинг муваффақиятли иштироки давом этди. 61 ва 92 килограммгача бўлган вазн тоифаларида гиламга чиққан полвонларимиз Нодир Раҳимов ҳамда Ажинияз Сапарниязов финалгача бўлган йўлни муваффақиятли босиб ўтишди. Бироқ ҳал қилувчи беллашувда иккалалари ҳам эронлик рақибларига имкониятни бой бериб қўйишди.
Шу тариқа эркин курашчиларимиз Осиё чемпионатини 2 тадан кумуш ва бронза медаллари билан якунлашди. Умумий ҳисобда эса делегациямиз 1 та олтин, 6 та кумуш ва 5 та бронза медалларини жамғаришди.
