Профессионал бокснинг супер енгил (-63,5 кг) вазн тоифасида NABF (Шимолий Америка бокс федерацияси) чемпионлик камари соҳиби, россиялик Максим Дадашев (13-1, 11 КО) 23 июль куни вафот этди. Бу ҳақда GoSport.uz мухбири хориж манбаларига таяниб хабар бермоқда.
Максим Дадашев 20 июль, жума куни АҚШнинг Оксон Ҳилл шаҳрида ташкил этилган бокс оқшомида пуэрто-рикалик Сабриэл Матиасга (14-0, 14 КО) қарши IBF чемпионлик камарига биринчи рақамли даъвогар бўлиш рингга кўтарилганди. Жанг давомида Дадашев жуда кўплаб зарбаларни етказиб юборди. 11 раунддан сўнг унинг мураббийи Бэд Макгрит жангни тўхтатишга қарор қилди. Аввалига Максим бунга розилик бермади, аммо якунда мураббий жангни тўхтатишга қарор қилди.
Жанг якунлангач, Дадашев ўзини ёмон ҳис қила бошлаган ва бироз ўтиб ҳушини йўқотган. Шундай сўнг яқин орадаги шифохонага етказилган спортчида миянинг ички шиши ташхиси қўйилган ва спортчи икки соат давомида шошилинч операция қилинган.
Операциядан сўнг спортчи сунъий кома ҳолатига тушиб қолган. Орадан уч кун ўтиб спортчининг юраги бундай оғир юкламаларни кўтара олмай уришдан тўхтаган.
Эслатиб ўтамиз, Максим Дадашев ўзбекистонлик боксчи Фазлиддин Ғоибназаров (7-1, 4 КО) билан биргаликда Top Rank промоутерлик компанияси таркибида шуғулланиб келган. Дадашев сентябрь ойида 29 ёшга тўлиши лозим эди.
