Халқаро чемпионлар кубоги доирасида "Атлетико" ва "Ювентус" жамоалари ўзаро Швецияда тўқнаш келишди.

Жамоалар баҳс бошиданоқ очиқ ўйин намойиш қила бошлади. Яратилган вазиятни биринчи бўлиб голга айлантириш мадридликларга насиб этди. Ўнг қанотдан етказиб берилган узатмани "матрасчилар"нинг янги ҳужумчиси Жоау Фелиш 12 метрлардан дарвозага жойлаб қўйди.

"Ювентус" орадан кўп ўтмасдан ҳисобни тенглаштирди. Туринликларнинг ҳужуми пайтида тўп Хедирага келиб тушди ва Сами 15 метрлардан дарвозани аниқ нишонга олди.

Орадан 4 дақиқа ўтиб яна ўша Фелиш чиройли гол муаллифига айланди. Деярли майдон марказидан етказилган узатма натижасида португалиялик футболчи сўнгги ҳимоячидан қочиб кетди ва битта уринишда "Ювентус" дарвозасини забт этди.

Иккинчи бўлимда "Юве" ҳисобни тенглаштириши мумкин эди, аммо тўп икки марта "Атлетико" дарвозаси устунига тегиб қайтди. Шу тариқа, Симеоне шогирдлари 2:1 ҳисобида ғалаба қозонишди.

International Champions Cup
Сольна, Швеция
Атлетико Испания – Ювентус Италия 2:1 (2:1, 0:0)
Голлар: 1:0 – 24 Жоау Фелиш, 1:1 – 29 Хедира, 2:1 – 33 Жоау Фелиш.
Атлетико – Облак, Хименес (Корреа, 56), Триппьер (Эрмосо, 56), Савич (Эррера, 57), Лоди (Санчес, 66), Коке (Фелипе, 57), Лемар (Витоло, 67), Сауль (Родриго Рикельме, 66), Льоренте (Томас, 46), Жоау Фелиш (Арьяс, 56), Мората (Диего Коста, 56; Шапонич, 90).
Ювентус – Шченсни (Буффон, 59), Кьеллини (Бонуччи, 46), Алекс Сандро (Куадрадо, 59), Де Шильо (Данило, 71), де Лигт (Демирал, 71), Хедира (Матюиди, 60), Рабьо (Жан, 71), Пьянич (Бентанкур, 60), Дуглас Коста (Бернардески, 60), Игуаин (Дибала, 60), Роналду (Манджукич, 71).
Огоҳлантиришлар: Витоло (69), Корреа (83).