«Барселона» ярим ҳимоячиси Усмон Дембеленинг агенти Мусса Сиссоко футболчи ҳақида тарқалган гап-сўзларга ўз муносабатини билдириб ўтди.

«Бу ёлғон. У Сенегалга учмади. У Реннга, ўзи онасининг олдига борди. Бунга 100 фоиз ишончим комил. Душанба кунги машғулот пайтида унда жароҳат борлиги маълум бўлди», – деди Сиссоко.

Шунингдек, агентнинг таъкидлашича, Дембеле "Барселона"ни тарк этмоқчи эмас.

«Усмон «Барселона»дан кетиш ҳақида бир дақиқа ҳам ўйлагани йўқ. Европанинг бошқа жамоаларидан қизиқишлар борлигига қарамай, унга "Барса"даги фаолияти ёқмоқда. У келажакда улкан ютуқларга эришмоқчи.

Афсуски, жароҳат Усмоннинг ажойиб мавсум ўтказишига халал бериб қолди. Аммо бу нарса унинг ғалабага бўлган иштиёқига таъсир кўрсатмайди. Ишончим комил, у қисқа вақт ичида сафга қайтади ва танқидларга ўз жавобини беради.

1000 фоизга ишончим комил, у «Барса»да қолади ва клуб шарафини ҳимоя қилади», – деди Сиссоко.