Европанинг таниқли компанияларидан бири "Double Pass"  вакиллари икки кундирки Бекободнинг “Металлург” жамоаси вакиллари билан мулоқотда бўлиб туришибди. Дастлабки куни улар Қибрай ўқув-машғулот масканига ташриф буюришди ва жамоа бош мураббийи, унинг ёрдамчилари билан суҳбатлашишди. Жамоани профессионал тарзда шакллантириш борасида олиб борилаётган ишлар кўлами билан танишишди. Иккинчи куни эса клуб раҳбарияти - бош директор, спорт ишлари бўйича директор, техник директор билан мулоқот давом эттирилди. Суҳбатлардан чиқариладиган хулосага кўра компания ва клуб ўртасида икки томонлама ҳамкорлик ўрнатилиши кутилмоқда.

Мазкур клуб вакиллари икки кунлик танаффусдан кейин Бекобод шаҳрига ташриф буюриши,  клуб инфратузилмаси, футболчиларга яратилган шарт-шароитлар, футбол академияси қурилиши ҳамда болалар футболи билан танишишмоқчи.

Эслатиб ўтамиз, ушбу компания футбол клублари тузилмасини ўрганиб, клуб, футболчилар ва академияларнинг янада ривожланиши учун ёрдам бериб келади. Унинг мутахассислари клубларда бўлиб, маълум вақт давомида бутун тизимни ўрганиб чиқишади ва иш қай даражада профессионал йўлга қўйилгани ҳақида ўз хулосасини беради.

"Double Pass" компанияси Германия бундеслигаси, Англия премьер-лигаси ҳамда жаҳонга машҳур клублар билан ҳамкорлик қилиб келади.