Тошкент ўсмирлар ўртасидаги Осиё чемпионатининг "В" саралаш гуруҳига мезбонлик қилмоқда. Бугун дастлабки тур доирасида Ўзбекистон U16 терма жамоаси Баҳрайнга қарши баҳс олиб борди.

Ҳисобни очиш вакилларимизга насиб қилди. Учрашувнинг 17-дақиқасида Риан Исломов терма жамоамизнинг ҳужумини самарали якунлади. Бўлим тугаши арафасида эса меҳмонлар ҳисобни тенглаштиришди.

Иккинчи бўлим ўрталарида Миркомил Абдураззоқов ўсмирларимизни ҳисобда олдинга олиб чиқди. Учрашувга қўшиб берилган дақиқаларда эса Рустам Турдимуродов учинчи голни уриб, Ўзбекистон ўсмирлар терма жамоасининг ғалабасини таъминлади.

Ҳиндистон ва Туркманистон термалари ўртасидаги ўйинда ҳиндлар қўшниларимиз дарвозасига жавобсиз 5та тўп йўллашди.

Азамат Абдураимов шогирдлари 20 сентябрь куни Туркманистон, 22 сентябрь куни Ҳиндистонга қарши майдонга чиқади. Терма жамоамизнинг ўйинлари "Жар" стадионида, 16:00да бошланади.

Эслатиб ўтамиз, гуруҳда 1-ўринни эгаллаган жамоа келаси йили бўлиб ўтадиган Осиё чемпионати йўлланмасини қўлга киритади. Иккинчи ўринни эгаллаганлар орасида 4та жамоа қитъа чемпионати йўлланмасини қўлга киритади. Баҳрайн эса мезбон сифатида автомат равишда мусобақада иштирок этади.

U-16 Осиё чемпионати-2020 саралаши
Ўзбекистон – Баҳрайн - 3:1  
Гол: Риан Исломов (17). Сайид Маҳмуд ал-Мусовий (43). Миркомил Абдураззоқов (69). Рустам Турдимуродов (90+6).

Ҳиндистон - Туркманистон - 5:0