Toshkent o‘smirlar o‘rtasidagi Osiyo chempionatining "V" saralash guruhiga mezbonlik qilmoqda. Bugun dastlabki tur doirasida O‘zbekiston U16 terma jamoasi Bahraynga qarshi bahs olib bordi.

Hisobni ochish vakillarimizga nasib qildi. Uchrashuvning 17-daqiqasida Rian Islomov terma jamoamizning hujumini samarali yakunladi. Bo‘lim tugashi arafasida esa mehmonlar hisobni tenglashtirishdi.

Ikkinchi bo‘lim o‘rtalarida Mirkomil Abdurazzoqov o‘smirlarimizni hisobda oldinga olib chiqdi. Uchrashuvga qo‘shib berilgan daqiqalarda esa Rustam Turdimurodov uchinchi golni urib, O‘zbekiston o‘smirlar terma jamoasining g‘alabasini ta’minladi.

Hindiston va Turkmaniston termalari o‘rtasidagi o‘yinda hindlar qo‘shnilarimiz darvozasiga javobsiz 5ta to‘p yo‘llashdi.

Azamat Abduraimov shogirdlari 20 sentyabr kuni Turkmaniston, 22 sentyabr kuni Hindistonga qarshi maydonga chiqadi. Terma jamoamizning o‘yinlari "Jar" stadionida, 16:00da boshlanadi.

Eslatib o‘tamiz, guruhda 1-o‘rinni egallagan jamoa kelasi yili bo‘lib o‘tadigan Osiyo chempionati yo‘llanmasini qo‘lga kiritadi. Ikkinchi o‘rinni egallaganlar orasida 4ta jamoa qit’a chempionati yo‘llanmasini qo‘lga kiritadi. Bahrayn esa mezbon sifatida avtomat ravishda musobaqada ishtirok etadi.

U-16 Osiyo chempionati-2020 saralashi
O‘zbekiston – Bahrayn - 3:1  
Gol: Rian Islomov (17). Sayid Mahmud al-Musoviy (43). Mirkomil Abdurazzoqov (69). Rustam Turdimurodov (90+6).

Hindiston - Turkmaniston - 5:0